Статистика агентлиги маълумотларига кўра, Ўзбекистонга 2022 йилда 5,2 миллион нафар чет эл фуқаролари туристик мақсадларда ташриф буюрган. Хўш, улар кўрсатилган хизматлардан рози бўлдими, ўзи мамлакатда хизмат кўрсатиш сифати қай даражада? “Дарё” мухбири шу ва шу каби бошқа саволлар билан Тошкентга келган хорижий сайёҳлар билан суҳбатлашди.
Англиянинг Лондон шаҳридан келганини айтган туристнинг айтишича, Ўзбекистонга келишидан аввал асосан бу ердаги иморатлар ҳақида маълумотга эга бўлган. У мамлакатга келгач қандай таассуротлар олгани ҳақидаги саволга қуйидагича жавоб берди:
“Ҳали тўлиқ фикр билдира олмайман, чунки бу энди биринчи кунимиз. Турмуш ўртоғим мамлакатингиз ҳақида жуда кўп изланишлар олиб борган. Бино ва иморатларингиз ҳақида катта тасаввурга эга эдим. Бу ерга келиб билдимки, таомларингиз ҳам жуда ажойиб экан”, — деди сайёҳ.
Туристнинг айтишича, Ўзбекистон хорижликлар учун қулай шаҳар бўлиш йўлида ҳеч нарсани ўзгартирмаслиги керак.
“Ҳозиргидек бўлиб қолинглар. Замонавийлашиб ҳам, тезлашиб ҳам кетманглар. Худди айни дамдагидек яхши ва меҳмондўст, ажойиб биноларга эга мамлакат бўлиб қолишингларни истардим”, — дея фикр билдирди у.
Австралиялик турист аввал Ўзбекистонни унчалик ривожланмаган давлат деб ўйлаганини, лекин келгач, тасаввурлари ўзгарганини билдирди.
“Мен Австралияданман, Ўзбекистонга биринчи бор келишим. Бугун Тошкентга келиб қолдик. Ўзбекистонга келишингиздан аввал нималарни кутгандингиз-у, бу ерга келгач нималар нотўғри бўлиб чиқди? Унчалик ривожланмаган давлат деб ўйлагандим, лекин келиб кўриб билдимки, Тошкент жуда ҳам замонавий, тоза шаҳар экан. Жуда-жуда чиройли мамлакат. Архитектураси гўзал”, — деди сайёҳ.
Ўзбекистоннинг деярли барча ҳудудларини айланиб чиқишга улгурган, уч ҳафтадан бери мамлакатда бўлиб турган франциялик жуфтликнинг айтишича, Тошкентда саёҳат қилиш қийин.
“Биз кўркам, қадимий иншоот ва монументларни кўрмоқчи эдик. Ва мақсадимизга эришдик, жуда ҳам роҳатландик. Ўзбекистоннинг ҳар гўшасини бориб кўрдик. Ажойиб саёҳат бўлди. Бироқ Тошкентда саёҳат қилиш қийин экан. Йўл кўрсатувчи белгилар ҳамма жойда ҳам йўқ, шаҳар эса жуда катта. Инсонлар қўлдан келганча ёрдам берди, аммо на ўзбек, на рус тилини билганимиз сабабли жуда қийналдик — мадрасани топиш учун бутун кунимизни сарфладик, ҳеч ким тўғри йўл кўрсатолмади, такси ҳайдовчилари ҳам”, — деди франциялик сайёҳ аёл.
Россиянинг Санкт-Петербург шаҳридан келган меҳмон Тошкент жуда иссиқ эканини айтиб, инфратузилма муаммосига ҳам эътибор қаратди.
“Балки пиёдалар ўтиш жойлари кўпдир, аммо мен ҳали учратмадим. Магистрал йўл бўйлаб ‘пешеход’лар йўқ. Ҳозиргина бир бола йўлни югуриб кесиб ўтаётганини кўрдим — салбий ҳолат. Шаҳар машиналарга мўлжаллангандек, пиёдаларга етарли шароитлар яратилмаган”, — деди у. Шунингдек, ушбу сайёҳ ўзбек палови жуда ҳам мазали эканини таъкидлади.
Суҳбатнинг тўлиқ шаклини видеоформатда кўринг:
Изоҳ (0)