Украина ҳудудининг қарийб 30 фоизи — 174 минг квадрат километри миналанган бўлиши мумкин, чунки шунча майдонда шиддатли жанговар ҳаракатлар бўлиб ўтган. Globsеc таҳлил марказининг ҳисоботига кўра, бу ҳудудлар Россия босқинчи кучлари томонидан қолдирилган портловчи моддалардан тозаланишга муҳтож.
Марказ экспертларининг фикрича, Украина Афғонистон ва Сурияни ортда қолдириб, дунёдаги энг катта миналанган ҳудудга айланди. Айни пайтда, Украинанинг кўплаб миналанган ҳудудларини ўрганиш ва ҳатто уларга кириш қийинлигича қолмоқда, мамлакат ҳудудининг тахминан 18 фоизи ишғол остида.
Энг кўп зарар кўрган ҳудудлар — Харков ва Херсон вилоятлари
Таҳлилчиларга кўра, энг кўп миналанган ҳудудлар Украина қўшинлари томонидан қайтариб олинган Харков ва Херсон вилоятларидир, чунки “рус аскарлари у ерда узоқроқ вақт бўлган”. Шу билан бирга, миналардан тозалаш муаммосининг характери 2022 йил февраль ойида Россия босқини бошланишидан олдинги вазиятдан фарқ қилади, деб ёзган ҳисобот муаллифлари. Улар оғирроқ ва узоқроқ кечган ҳарбий ҳаракатларга, потенциал ифлосланиш майдонининг 10 баравар кўпайишига, шунингдек, ҳозир анча кенг доирада ишлатилаётган ўқ-дориларга ишора қилган.
Ҳисоботда айтилишича, Россия кучлари ҳайвонлар ва жасадларга фаоллаштирилган миналар ўрнатмоқда, йўллар, далалар ва ўрмонларда иккиталик ва учталик мини-тузоқларни қолдиряпти. Қолаверса, улар қишлоқ хўжалигига оид майдонлар ва ерларни атайлаб миналаб, фойдаланишга яроқсиз ҳолга келтирмоқда.
Ҳозирча Украинада миналардан тозалаш ишлари жуда секин суръатда кетмоқда, дейди Globsеc. 2015 йилнинг февралидан бери Донецк ва Луганск вилоятларида 16 минг квадрат километр майдон миналардан тозаланишга муҳтож, шундан 7 000 квадрат километр — Украина томонидан назорат қилинадиган ҳудудлар. Шу билан бирга, 2015—2021 йилларда миналардан тозаланган ҳудудларнинг ҳақиқий ҳажми атиги 414,56 квадрат километрни ташкил этган. Бу потенциал миналанган майдонларнинг атиги 2,5 фоизини ташкил қилади.
Globsеc таъкидлашича, Украинада 500 га яқин турли миналардан тозалаш гуруҳлари ишламоқда, уларга 5 000 га яқин ҳарбий муҳандис ва сапёрлар жалб этилган. 4 700 квадрат километр майдонни тозалаш учун уларга тахминан 20 йил керак бўлади. Агар 174 минг квадрат километр майдонни ўқ-дорилардан тозалаш кераклиги ҳисобга олинса, унда ҳозир ишлаётган мутахассисларга бунинг учун 757 йил керак бўлади, дейди мутахассислар.
Изоҳ (0)