Украиналик болаларни Россия ҳудудига мажбуран кўчириш амалиёти геноциднинг халқаро таърифига мос келади. Бу ҳақда 27 апрель куни Европа Кенгаши парламент ассамблеяси (PACE) томонидан қабул қилинган резолюцияда айтилади.
Ҳужжатга кўра, депортация қилинган болалар “руслаштириш” жараёнига дуч келаётгани ҳақида далиллар мавжуд: хусусан, улар рус тилида қайта ўқитилмоқда ёки уларга украин тилида гапириш тақиқланмоқда.
PACE резолюциясида украиналик болаларнинг олиб кетилиши, шубҳасиз, Россия давлат сиёсатининг бир қисми экани қайд этилган. Ҳужжат муаллифларининг фикрича, бу ҳаракатлардан мақсад “уларнинг украиналик эканини билдирувчи барча хусусиятларини йўқ қилиш”.
Резолюцияда, шунингдек, Гаагадаги Халқаро жиноий суднинг Россия президенти Владимир Путин ва болалар омбудсмани Мария Львова-Беловани ҳибсга олишга ордер бериш ҳақидаги қарори олқишланади.
PACE резолюцияси уруш бошидан бери украиналик болаларни зўрлик билан олиб чиқишни тўғридан тўғри геноцид деб атаган биринчи халқаро ҳужжат бўлди.
Март ойида украиналик болалар депортация қилингани учун Халқаро жиноий суд Россия президенти Владимир Путин ва болалар ҳуқуқлари бўйича комиссар Мария Львова-Беловани ҳибсга олишга ордер берган эди. ХЖС айблов хулосасида уларнинг ҳаракатлари геноцид эмас, балки уруш жиноятлари сифатида баҳоланади.
Россия ҳукумати болаларни босиб олинган Украина ҳудудидан олиб чиқаётганини инкор этмаяпти, бироқ бу уларнинг хавфсизлигини таъминлаш мақсадида эвакуация қилинаётганини даъво қилмоқда.
Изоҳ (0)