Украина армиясида сапёрлар етишмаётгани ҳамда Россиянинг эҳтимоли салбий муносабатидан чўчиб НАТО ўз мутахассисларини жўната олмаслиги сабаб Польша миналардан тозалаш бўйича яширин операция учун Украинага профессионал полициячилар отрядини юборган. Бу ҳақда Wirtualna Polska хабар бермоқда.
Миссия Украина ҳукумати Европа Иттифоқининг аксилтеррор бўлинмалари ассоциациясига (ATLAS) аъзо мамлакатларга сапёрлар юбориш сўрови билан мурожаат қилганидан кейин бошланган. 38 давлатдан фақат Польша бунга рози бўлган. Польша ички ишлар вазири Мариуш Каминский топшириғига кўра гуманитар полиция контингенти тузилган, унинг таркибига операцияда ихтиёрий равишда иштирок этишни истаган аксилтеррор полициясининг алоҳида бўлинмалари ходимлари, жами — 98 киши киритилган.
Нашрнинг таъкидлашича, хавфсизлик нуқтаи назаридан операция ҳақида сапёрлар Польшага қайтганидан кейингина хабар берилган.
Сапёрлардан ташқари, гуруҳ таркибига фелдшерлар ва миссия аъзоларини қўриқлаш учун “жанговар гуруҳ аъзолари” кирган, шунингдек, улар миналарни топишга ўргатилган иккита итни ҳам олиб кетишган. Миссия октябрь ойи бошида Украинага бориб, мамлакатда беш ойча қолган.
Польшадан келган гуманитар миссия жами 342 минг квадрат метрдан ортиқ майдонни, шу жумладан 17,5 минг метр йўлларни снарядлардан тозалаб, 2 мингга яқин хавфли моддаларни зарарсизлантирган. Польша полицияси ходимлари, жумладан, Киев, Днепр ва бошқа жойларда ишлаган. Операция давомида миссия аъзоларидан ҳеч ким жабрланмаган.
23 февраль, пайшанба куни миссия аъзоларини Польша президенти Анжей Дуда ва Ички ишлар вазирлиги раҳбари қабул қилади, деб қайд этмоқда Rzeczpospolita.
Изоҳ (0)