АҚШ Украина армиясига Abrams танкларини етказиб беришни тезлаштириши керак, агар улар сентябргача Украина Қуролли кучлари ихтиёрига топширилмаса, “жуда кеч” бўлиши мумкин, деди сенатор Ангус Кинг АҚШ Сенати Қуролли кучлар қўмитасидаги тингловда.
Сенатор Киевда бу йил Россия армиясига қарши туриш учун етарлича ўт очиш кучлари бўлмаслигидан хавотирда эканини билдирди ва Abrams танкларни ҳозирданоқ Польша ҳудудига жойлаштиришга чақирди, шунда май ойида Украина ҳарбийларини ўқитиш тугаганидан сўнг, зудлик билан танкларни уларга топшириш имкони бўлади.
Бошқа конгрессменларнинг таъкидлашича, Байден Украинага танкларни етказиб беришни тезлаштиришга қодир, аммо бунинг учун керакли ҳаракатларни қилмаяпти. Сенатор Том Коттоннинг фикрича, ҳарбий таъминотни кечиктириш тўғрисида сиёсий қарор қабул қилинган.
АҚШ Украинага Abrams танкларини ваъда қилган
2023 йил 25 январь куни АҚШ ҳукумати Abrams танкларини Украинага топширишга қарор қилди, Пентагон бу жараён бир йилдан кўпроқ вақтни олиши мумкинлигини билдирди. Шундан сўнг АҚШ ҳарбийлари танкларни захиралардан олиш ва етказиб беришга тайёрлаш учун қайта текширувдан ўтказиш ҳақида ҳисобот берди. Reuters хабарига кўра, улар кузда Украина армиясига топширилиши мумкин. Америка танкларини етказиб беришнинг сустлиги бўйича танқидлар фонида Пентагон можарога ягона самарали ечим йўқлигини таъкидлади.
Украина ҳукуматининг қарши ҳужуми баҳор ёки ёзда амалга оширилиши кутилмоқда. Newsweek маълумотларига кўра, ҳужум 30 апрелда бошланиши мумкин. Шу билан бирга, Украина Олий Радаси Ғарб техникаси етарли эмаслиги сабаб ҳужум апрель ойидан номаълум муддатга қолдирилганини маълум қилган.
Изоҳ (0)