Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилди.
Бугун, 28 апрель куни Жиноят ишлари бўйича Ўрта Чирчиқ туман судида айбланувчи Дониёр Маҳаматов иши юзасидан суд мажлиси ўтказилди. Бу ҳақда “Дарё” мухбири хабар берди.
Маълум бўлишича, Маҳаматов муқаддам содир этган маъмурий ҳуқуқбузарлиги сабаб ҳайдовчилик гувоҳномасидан фойдаланиш имкониятидан маҳрум этилган. Кейин “права” олиш учун назарий ва амалий имтиҳонларни муваффақиятли топширгани ҳақидаги қалбакилаштирилган сертификатни ЙҲХБга тақдим этган ва чеклов сабабли сақланаётган ҳайдовчилик гувоҳномасини қайтариб олишга эришган.
Дониёр Маҳаматов ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш жиноятини содир этганликда айбланди. Унга нисбатан Жиноят кодексининг 228-моддаси 2-кисми “б” қисми билан иш ҳақининг 20 фоизини давлат даромади ҳисобига ушлаб қолган ҳолда 2 йил муддатга, 228-модданинг 3-қисми билан иш ҳақининг 20 фоизини давлат даромади ҳисобига ушлаб қолган ҳолда бир йил муддатга ахлоқ тузатиш ишлари жазоси тайинланди.
Маҳаматовга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланди.
“Ҳайдовчилик гувоҳномасини олиш учун курсларда ўқидим. Кўп марта имтиҳон топшириб, ўта олмадим. Кейин бир номаълум шахс сертификат берди. Ундан фойдаланиб, “права” олдим. У сертификат қалбаки экан. Кейин тергов ўтказилди. Мана бугун суд ҳукми эълон қилинди. Бу қилмишимдан афсусдаман”, – дейди айбланувчи.
Тошкент имтиҳон маркази ходими Жаҳонбек Эрназаров “Дарё”га берган интервьюсида Маҳаматовдан икки марта имтиҳон олганини айтди.
“Ҳайдовчилик гувоҳномаси олиш учун тайёрланганлардан назарий имтиҳон олиш билан шуғулланаман. Бу шахсдан (Д.Маҳаматовдан) икки марта имтиҳон олганман. Икковида ҳам йиқилган. Ўзи 5-6 марта имтиҳон топширган. Бўлажак ҳайдовчиларга маслаҳатим, яхшилаб тайёрланса, ўқиса, имтиҳондан биттада ўтиб кетади. Имтиҳон қийин эмас — ўқиган одам ўтади. Ўқимаган одамлар қийин бўлиб кетибди деб, баҳона қилади”, – деди у.
Жаҳонбек Эрназаровнинг қўшимча қилишича, тестдан ўта олмаган аксарият ҳайдовчилар имтиҳон олувчиларга пора таклиф қилади.
“Имтиҳондан ўта олмаган кўплаб ҳайдовчилар яхши баҳо қўйиб беришимиз учун пул таклиф қилади. Ўзимни таҳлилларимга кўра, ҳар икки одамдан бири пора беришга уринади. Бермоқчи бўлган пулининг аниқ суммасини айтади. Марказда 1,5 йилдан бери ишлаяпман. Афсуски, бундай ҳолатлар жуда кўп учрайди. Айрим ҳайдовчилар ишлаш ёки ўқиши натижасида “права” олиш учун билимларни яхши ўзлаштира олайди. Агар диққат билан ўқиб, ўрганилса, албатта имтиҳонлардан ўтиш мумкин. Бугунги кунда ҳар 100 нафар имтиҳон топширган ҳайдовчилардан 40 нафари биринчи топширишдаёқ ўтмоқда”, – дейди ходим.
Изоҳ (0)