Тошкент шаҳар Янгиҳаёт туманидаги автомойкадан олиб қочилган машина ЙТҲга учраб, ташлаб кетилган ҳолатда топилди. Бу ҳақда Тергов департаменти ахборот хизмати хабар берди.
Хабарга кўра, 24 апрель куни туманнинг Ўзар кўчасида яшовчи 35 ёшли А.А. Тошкент шаҳар ИИББга мурожаат қилган. Унда 23 апрель куни Сергели 5 даҳаси 2-метро бекати ёнида жойлашган автомашина ювиш шохобчаси ишчиси Искандар исмли шахсга ўзига тегишли бўлган оқ рангли Lacetti русумли автоуловини ювиш учун калити билан ташлаб кетганини айтган.
Эртаси куни автоуловини олиб кетиш учун келган вақтида машина ва Искандар исмли шахс ювиш шохобчасида йўқлигини кўриб, ушбу шахсни аниқлашда ва автомашинасини топишда амалий ёрдам беришни сўраган.
Олиб борилган тергов-тезкор ҳаракатлар натижасида, мазкур жиноятни Андижон вилоятида яшовчи 20 ёшли У.И. содир этгани аниқланган. Жабрланувчига тегишли бўлган автомашина у томонидан Тошкент вилояти Оҳангарон тумани “водий йўли”да давлат рақамлари ечилган ва йўл транспорт ҳодисасига учраган ҳолда ташлаб кетилгани аниқланди.
Мазкур ҳолат юзасидан Сергели тумани ИИО ФМБ Тергов бўлими томонидан У.И.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Ҳозирда гумонланувчи У.И.ни қидириб топиш ишлари олиб борилмоқда. Тергов ҳаракатлари давом этмоқда.
Изоҳ (0)