Ўзбекистон Германия билан хирургия ва онкология соҳасида ҳамкорликни йўлга қўйди

Ўзбекистон Германия Helios Klinikum Northheim клиникалари билан хирургия ва онкология соҳасида ҳамкорликни йўлга қўйди. Бу ҳақда ССВ ахборот хизмати хабар берди.

Хабарга кўра, Соғлиқни сақлаш вазири Амрилло Иноятов Германиянинг нуфузли Helios Klinikum Northheim жарроҳлик клиникалари тиббий директори ва бош врачи доктор Аксел Рихтер билан учрашув ўтказди. Мулоқотда кейинги йилларда икки томонлама ҳамкорлик алоқалари қатор соҳалар, хусусан, тиббиёт йўналишида ҳам жадал ривожланиб бораётгани қайд этилди.

Қайд этилишича, , Европанинг юқумли касалликларни ўрганиш соҳасидаги нуфузли илмий-тадқиқот муассасаси — Роберт Кох институти ва машҳур “Шарите” клиникаси мутахассислари билан яқиндан ҳамкорлик ўрнатилиши мамлакат тиббиётида даволаш-диагностик технологияларни амалиётда қўллаш, жарроҳлик соҳасидаги тажриба ва усулларни ўзлаштириш борасида муҳим омил бўлди.

Мулоқот сўнгида вазир ва А.Рихтер қатор йўналишлар, жумладан, хирургия ва онкология соҳалари  бўйича кадрлар алмашиш, улар малакасини ошириш юзасидан ўзаро ҳамкорлик қилишга келишиб олди.