Хитойнинг Франциядаги элчисининг постсовет мамлакатлари халқаро ҳуқуқда ҳақиқий мақомга эга эмаслиги ҳақида баёнот берганди. “Юксалиш” умуммиллий ҳаракати раиси Бобур Бекмуродов элчининг кўплаб эътирозларга сабаб бўлган мазкур баёнотига муносабат билдирди.
“Юксалиш” раиси Ўзбекистонни суверен демократик республика сифатида 150 дан ортиқ давлатлар, жумладан, Хитой — 1991 йил 27 декабрда, АҚШ — 1991 йил 25 декабрда халқаро майдонда мустақил субъект сифатида тан олганини эслатиб ўтган.
Россия билан 1992 йил 20 мартда дипломатик алоқалар ўрнатиш бўйича протокол имзоланган ва Ўзбекистон мустақил мамлакат сифатида эътироф этилган. Ўзбекистон БМТ, ЙХҲТ, МДҲ, Туркий давлатлар ташкилоти, Шанхай ҳамкорлик ташкилоти каби нуфузли тузилмаларнинг тенг ҳуқуқли аъзоси ҳисобланади.
Ўзбекистонда 120 дан ортиқ миллат ва элатлар тинч-тотув ва ҳамжиҳатликда яшаб келмоқда. 36 миллионлик Ўзбекистон аҳолиси 2030 йилда 40 миллионга, 2040 йилда 50 миллионга етиши прогноз қилинмоқда.
“Биз уч минг йиллик давлатчилик тарихига эга бўлган юртмиз. Шу туфайли, постсовет ҳудудидаги мамлакатларнинг мустақиллиги борасидаги ҳар қандай шубҳалар ва зиддиятли фикрларнинг Ўзбекистонга ҳеч қандай алоқаси йўқ. Ўзбекистон мустақиллиги дахлсиздир”, — деб ёзади Бобур Бекмуродов.
Хитойнинг Франциядаги элчиси собиқ СССР давлатлари суверенитети ҳақида нималар деганди?
Хитойнинг Франциядаги элчиси Лу Шай Қрим яриморолини тарихий жиҳатдан Россияники деб атади ва Совет Иттифоқи парчаланганидан кейин ташкил топган мустақил давлатлар гўёки дунёда қонуний мустаҳкамланган мақомга эга эмаслигини айтди.
Дипломат собиқ Совет Иттифоқи давлатлари гўёки амалдаги халқаро ҳуқуқда ҳеч қандай самарали мақомга эга эмаслиги, чунки “бирорта ҳам халқаро шартномада уларнинг суверен давлат сифатидаги мақоми белгилаб қўйилгани йўқ”лигини билдирганди.
Хитой элчисининг баёнотини Болтиқбўйи давлатлари ва Украина, Франция кескин қоралади. Улар расман Хитойни мазкур баёнотга муносабат билдиришга чақирди.
Кейинроқ Хитой ТИВ Франциядаги элчисининг собиқ СССР давлатлари суверенитетига шубҳа билдирувчи сўзларини инкор қилди. “Тегишли масала бўйича Хитойнинг позицияси ўзгармаган. Ҳудудий суверенитетга келсак, Хитойнинг позицияси доимо аниқ бўлиб келган. Хитой барча мамлакатларнинг суверенитети, мустақиллиги ва ҳудудий яхлитлигини ҳурмат қилади ҳамда Бирлашган Миллатлар Ташкилоти низомининг мақсад ва тамойилларини қўллаб-қувватлайди”, — деди ТИВ вакили.
Изоҳ (0)