Андижон вилояти Балиқчи туманида 25 апрель куни йўл-транспорт ҳодисаси юз берган. Оқибатда бир нафар автойўл ходими оғир тан жароҳатлари натижасида вафот этган. Бу ҳақда Балиқчи тумани ҳокимлиги ахборот хизмати хабар бермоқда.
Маълум бўлишича, 25 апрель куни Балиқчи туман йўллардан фойдаланиш унитар корхонаси умум-фойдаланувидаги 4Р-112 Фарғона ҳалқа автомобиль йўлининг 109-километрида корхона директори, бош ва ҳаракат хавфсизлиги муҳандислари, мазкур йўлга бириктирилган 54-йўл бўлими ишчи ходимлари йўл-патрул хизматчиси назорати остида йўл белгилари билан таъминланган ҳолда жорий таъмирлаш ишлари олиб боришган. Таъмирлаш ишлари вақтида, яъни соат 20:30 ларда “Жартепа” маҳалласида яшовчи Б.Ш. спиртли ичимлик таъсирида бошқарувида бўлган “ВАЗ 2101” русумли автомашинасида йўл-транспорт ҳодисаси содир этган.
Натижада корхонанинг икки нафар ишчиси оғир тан жароҳат олган ҳолда туман шошилинч тез тиббий ёрдам бўлимига олиб борилган. Бироқ бир нафар ходим кўрсатилган биринчи тиббий ёрдамга қарамасдан олган тан жароҳатлари натижасида шифохонада вафот этган. Иккинчи ходим эса айни пайтда шифокорларнинг доимий назорати бўлиб турибди.
Мазкур ҳолат юзасидан ҳуқуқни муҳофаза қилувчи органлар томонидан терговга қадар текширув ишлари олиб борилмоқда.
Ҳокимлик ахборот хизматининг таъкидлашича, йўлда таъмирлаш ва тиклаш ишлари Вазирлар Маҳкамасининг 2011 йил 31 декабрдаги қарорида белгиланган тартибда ҳамда Балиқчи туман йўллардан фойдаланиш унитар корхонасининг жамоа шартномаси асосида олиб борилган.
Аввалроқ Марҳамат туманида ишдан ташқари вақт — кечаси 21:00 дан кейин ишга чақирилган ободонлаштириш ходими йўлда ЙТHgа учраб, вафот этгани хабар қилинганди.
Изоҳ (0)