Ўзбекистондаги айрим мактаблар, хусусан президент мактабларида испан тилини ўқитиш йўлга қўйилиши мумкин.
Хабарга кўра, мамлакатнинг Мадриддаги элчихонаси ташаббуси билан Ўзбекистоннинг Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги ва Испания Таълим ва касбга ўқитиш вазирлиги ҳамда мутасаддилари иштирокида VKА шаклида учрашув ташкил этилди.
Бўлиб ўтган музокараларда Ихтисослаштирилган таълим муассасалари агентлигининг халқаро ҳамкорлик бўлими бош мутахассиси Акром Умархўжаев томонидан президент, ижод ва ихтиосослаштирилган таълим муассасалари фаолияти, жорий қилинган халқаро стандартларга мос ўқув жараёнлари ва замонавий баҳолаш стандартлари ҳақидаги маълумотни презентация шаклида испан томонига сўзлаб берилди.
Ўз навбатида хориж томони испан тилини ўқитишни Ўзбекистоннинг ихтисослаштирилган таълим муассасаларида, хусусан, биринчи галда президент ва ижод маткабларида икки тилли бўлимлар дастури, чет тили ўқитувчиларнинг ёрдамчилари дастури, Испания талим ва касбга ўқитиш вазирлигининг ресурс марказлари фаолиятини жорий қилиш орқали ҳамкорлик алоқаларини йўлга қўйишни таклиф этди.
Шунингдек, музокаралар давомида юқоридаги йўналишларда ҳамкорлик алоқаларини йўлга қўйиш масалаларини муҳокама қилиш мақсадида 24—27 апрель кунлари Ўзбекистонга ташриф буюриши режалаштирилган Испания делегацияси дастури доирасида Ихтисослаштирилган таълим муассасалари агентлиги раҳбарияти билан музокаралар олиб бориш ҳамда Тошкент ва Самарқанд шаҳарларидаги президент ва ижод мактабларига ташриф буюриш бўйича келишувларга эришилди.
Шунингдек, Ўзбекистондаги мактабларда испан тилини ўқитиш бўйича дастурлар жорий қилинади. Ушбу дастурлар жорий қилинган мактаблар бошқа таълим муассасаларига нисбатан мавқейи юқори бўлиб, иқтидорли ўқувчиларга миллий шаҳодатнома билан бирга Испания шаҳодатномаси тақдим этилади.
Изоҳ (0)