“Finlyandiya bilan hamkorlikda O‘zbekistonda korrupsiyaga qarshi kurashish bo‘yicha uzoq muddatli strategiya ishlab chiqiladi” — Akmal Burhonov

O‘zbekistonda korrupsiyaga qarshi kurashishda Estoniya va Finlyandiya tajribasi qo‘llanadi. Bu haqda Korrupsiyaga qarshi kurashish agentligi direktori Akmal Burhonov 17—20-aprel kunlari Estoniya va Finlyandiyaga qilgan tashrifi yuzasidan “Daryo”ga bergan qisqacha intervyusida aytib o‘tdi.

Akmal Burhonovning ma’lum qilishicha, tashrif davomida korrupsiyaga qarshi kurashishda uzoq va o‘rta muddatga mo‘ljallangan strategiyalar va davlat dasturlarini ishlab chiqish sohasidagi tajribalar o‘rganilgan.

“Uchrashuv natijasiga ko‘ra, bir qator kelishuvlarga erishildi. Xususan, Estoniyaning Elektron hukumat akademiyasi bilan birgalikda yirik hamkorlik loyihasini ishlab chiqish hamda amalga oshirishni rejelashtiryapmiz. Ushbu loyiha doirasida O‘zbekistonda ijtimoiy ahamiyatga ega bo‘lgan, ya’ni ochiqlanishi lozim bo‘lgan ma’lumot ko‘lamini kengaytirish va aholiga davlat xizmatlarini ko‘rsatishda byurokratiya hamda korrupsiyaviy omillarni yo‘q qilish bo‘yicha ishlar amalga oshiriladi”, — dedi Korrupsiyaga qarshi kurashish agentligi direktori.

Uning alohida ta’kidlashicha, Finlyandiya Tashqi ishlar vazirligi ko‘magida O‘zbekistonda huquq ustuvorligi yo‘nalishida katta loyihani ishga tushirishga kelishib olingan.

“Mazkur loyiha Finlyandiyaning Qonun ustuvorligi markazi bilan birga amalga oshiriladi. Eng avvalo, O‘zbekistonda korrupsiyaga qarshi kurashish bo‘yicha uzoq muddatli strategiyani ishlab chiqish va amaliyotga joriy etish ko‘zda tutilgan. Shuningdek, mamlakatimizda davlat idora va korxonlarida korrupsiyaga qarshi ichki tuzilmalari faoliyatini takomillashtirishga qaratilgan”, — dedi Akmal Burhonov.

Ta’kidlanishicha, bugungi kunda Estoniya elektron hukumatni joriy etish va rivojlantirish bo‘yicha Yevropa hamda dunyoda yetakchilardan biri hisoblanadi. Aholiga ko‘rsatiladigan davlat xizmatlari soni 600 dan ortiqni, tadbirkorlarga ko‘rsatiladigan davlat xizmatlari soni esa 2 400 dan ortiqni tashkil etadi.

Finlyandiya Transparency International xalqaro tashkilotining Korrupsiyani qabul qilish indeksida 2-o‘rinni egallab, dunyodagi eng korrupsiyasiz davlat sifatida e’tirof etib kelinmoqda.

• O‘zbekistonda vazirlik va davlat tashkilotlarining ochiqlik indeksi eʼlon qilindi
• Antikorrupsiya agentligi rahbari 2023-yilgacha kimlardan va qanday sovg‘alar qabul qilgani ochiqlandi