АҚШ ва Филиппин энг йирик қўшма ҳарбий машғулотларни бошлади. Хитой бундан норози

АҚШ ва Филиппин тарихдаги энг йирик Баликатан қўшма ҳарбий машғулотларини бошлади, унда 17 мингдан ортиқ аскар иштирок этади. Мамлакатлар ўртасидаги муносабатлар Хитойнинг Осиё-Тинч океани минтақасидаги ҳаракатларидан хавотирлар фонида мустаҳкамланмоқда, деб ёзади Reuters.

Жанговар отишма, десант ва авиация операциялари, кибермудофаа ва терроризмга қарши курашни ўз ичига олган манёврлар тахминан уч ҳафта, 28 апрелгача давом этади. Машғулотдан кўзланган мақсадлардан бири — “денгиздан зарба бериш бўйича қўшма тактика ва тартибларни ўрганиш”, дейди Филиппин ҳарбийларининг манёврларига раҳбарлик қилувчи генерал майор Марвин Ликудин.

Ўз навбатида америкалик генерал майор Эрик Остиннинг таъкидлашича, Баликатан машғулотлари унда иштирок этувчи томонларни “чинакам чақириқларга биргаликда жавоб бериш”га тайёрлайди. Бундан ташқари, бу ҳафта Вашингтонда АҚШ ва Филиппин мудофаа котиблари ва ташқи ишлар вазирларининг етти йил ичида биринчи учрашуви бўлиб ўтади.

Пекин АҚШ ва Филиппиннинг ҳаракатларини танқид қилмоқда

Хитой Ташқи ишлар вазирлиги 10 апрель куни АҚШ—Филиппин қўшма машғулотларини танқид қилиб, улар “Жанубий Хитой денгизидаги баҳсларга аралашмаслиги керак, Хитойнинг ҳудудий суверенитети, денгиздаги ҳуқуқ ва манфаатлари, шунингдек хавфсизлик бўйича манфаатларига камроқ зарар етказиши шарт” деб таъкидлади.

Шу билан бирга, ўша куни Хитойнинг ўзи Тайван яқинида уч кунлик ҳарбий машғулотларни якунлади, улар давомида аниқ зарбалар бериш ва расмий Пекин ўз ҳудуди деб биладиган оролни блокада қилиш амалиёти ўтказилди.

Вашингтон ва Манила ўртасидаги алоқалар мустаҳкамланмоқда

Reuters таъкидлаганидек, Вашингтон ва Манила ўртасидаги муносабатлар Филиппин президенти кичик Фердинанд Маркос даврида сезиларли даражада илиқлашди — февраль ойида у АҚШ учун Филиппиндаги ҳарбий базаларга кириш имкониятини кенгайтирган эди. 

Ҳар йили ўтказиладиган Баликатан машғулотларининг мисли кўрилмаган даражада кенгайтирилиши икки мамлакат мудофаа алоқалари яхшиланганини кўрсатади. Маркосдан аввалги президент Родриго Дутерте эса, аксинча, Пекин билан яқинроқ алоқаларни ўрнатиш учун ҳарбий машғулотларни қисқартирган эди.