Покистон полицияси ўзини пайғамбар деб даъво қилган мусулмон аёлни куфрликда айблаб ҳибсга олди. Бу ҳақда Associated Press хабар берди.
Аёлнинг исми Санауллоҳ бўлиб, Панжоб провинциясидаги Файсалобод шаҳридаги уйида ҳибсга олинган. Унинг уйи олдида тўпланган оломон аёлга жазо тайинлашни талаб қилган. Аёл билан бирга яна икки киши ҳибсга олинган.
Покистонда ислом динини ёки Муҳаммад пайғамбарни ҳақорат қилишда айбдор деб топилган ҳар қандай шахс ўлим ёки умрбод қамоқ жазосига ҳукм қилиниши мумкин. Мисол тариқасида, Покистонда эркак WhatsApp’га жойлаштирган контенти сабаб ўлимга ҳукм қилинганди. Покистонда куфр жуда нозик масала бўлиб, ҳатто исботланмаган айбловлар ҳам зўравонликни қўзғатиши мумкин.
Покистон расмийлари февраль ойида “куфрона” контентни олиб ташлаш талабларини бажармагани учун Wikipedia веб-энциклопедиясини блоклаганди. Wikipedia компаниясига ушбу маълумотларни ўчириш учун 48 соат вақт берилганди. На нашр, на Покистон расмийлари қайси “куфрона” контентни назарда тутгани ҳақида маълумот берилмаган.
Изоҳ (0)