Германия ҳукумати мамлакатдаги сўнгги учта атом электр станциясини ҳам ёпди. Бу ҳақда ZDF хабар бермоқда.
Бавариядаги Isar 2 атом электр станцияси, Баден-Вюртембергдаги Neckarwestheim 2 ва Қуйи Саксониядаги Emsland станциялари тармоқдан узилди.
“Авария юз берган тақдирда атом энергетикаси билан боғлиқ хавф-хатарларни назорат қилиб бўлмайди”, — деди Германиянинг Атроф-муҳит ва ядровий хавфсизлик вазири, “Алянс 90/Яшиллар” партияси вакили Штеффи Лемке.
Парламентдаги Социал-демократик партия фракцияси Twitter’да шундай пост қолдирди: “Атом энергияси? Хайр!” Ўз навбатида, Германия эркин демократик партияси (FDP) бош котиби Бижан Жир-Cарай АЭСдан бутунлай воз кечмасликка чақирди.
Deutsche Welle нашрининг қайд этишича, 15 апрель куни қатор шаҳарларда атом энергетикаси мухолифлари АЭСларнинг ёпилишини кунбўйи митинглар билан нишонлаган. Станциялар ёпилишига қарши одамлар ҳам кўчаларга чиққан. Нашрнинг эслатишича, YouGov институти томонидан ўтказилган сўров натижаларига кўра, немисларнинг учдан икки қисми мамлакатдаги сўнгги атом электр станцияларининг ёпилишига қарши.
Ядро энергиясидан узил-кесил воз кечиш қарори Германияда 2011 йилда — Фукусима атом электр станциясидаги ҳалокатдан кейин қабул қилинган эди. Охирги станциялар 2022 йил охиригача ёпилиши керак эди, бироқ Россиянинг Украинага кенг кўламли босқини ва ундан келиб чиққан энергетика инқирози туфайли АЭСлар фаолиятини тўхтатиш апрель ойига кўчирилди.
Изоҳ (0)