Судандаги тўқнашувлар чоғида 97 киши ҳалок бўлди, 365 киши яраланди, деб хабар бермоқда Reuters шифокорлар уюшмасига таяниб. Жаҳон соғлиқни сақлаш ташкилоти маълумотларига кўра, 13 апрелдан бери камида 83 киши ҳалок бўлган, 1100 дан ортиқ одам жароҳат олган. Қурбонлар орасида Бирлашган Миллатлар Ташкилоти Жаҳон озиқ-овқат дастурининг 3 нафар ходими бор.
16 апрель куни низолашаётган томонлар – мунтазам армия ва “Тезкор ҳаракат кучлари” БМТнинг ҳарбий ҳаракатларни ярим кунга тўхтатиш ҳақидаги таклифига рози бўлди.
БМТ Жаҳон озиқ-овқат дастури директори Синди Маккейн можаро томонларини ходимлар хавфсизлигини таъминлайдиган, ташкилот ходимлари ва унинг ҳамкорларига Суданнинг муҳтож аҳолисига гуманитар ёрдам кўрсатиш имконини берадиган келишувга эришишга чақирди.
Суданда тўқнашувлар 15 апрель куни эрталаб бошланган, унда артиллерия ва авиациядан фойдаланилмоқда. Кузатувчилар Судандаги можаро сабабини “Тезкор ҳаракат кучлари”ни Судан Қуролли кучларига қўшиб олиш борасидаги баҳслар, кенгроқ айтганда, ҳокимиятнинг ҳарбийлардан тинч аҳолига ўтиши билан боғлиқ тортишувлар сифатида келтирмоқда.
Тўқнашувлар Хартум ва мамлакатнинг бошқа шаҳарларини қамраб олган.
Вице-президент генерал Дагалога бўйсунувчи “Тезкор ҳаракат кучлари”нинг вакиллари пойтахтдаги қатор муҳим объектлар, жумладан, президент саройини эгаллаб олгани ҳақида маълум қилганди. Судан ҳукумати раҳбари генерал Ал-Бурхон буни рад этмоқда.
Изоҳ (0)