Самарқанд туманидаги 26-мактаб ҳожатхонасига камера ўрнатилгани ҳақидаги хабарлар тарқалди. Вилоят Мактабгача ва мактаб таълими бошқармаси ҳолатга муносабат билдирди.
Унда айтилишича, ҳолат Самарқанд тумани Мактабгача ва мактаб таълими бўлими масъуллари томонидан атрофлича ўрганилди. Ўрганишлар давомида аниқланишича, мактабнинг маънавий-маърифий ишлар бўйича директор ўринбосари Р.Ш. ўғил болалар ҳожатхонасида тозаликка риоя этилмаётгани сабабли уларни тартибга чақириш учун ўрнатган.
Ушбу камера (муляж) яроқсиз бўлиб, тармоққа уланмаган бўлган. Ўрганишлардан сўнг ускуна олиб ташланган.
Хабарда маълум қилинишича, ишчи гуруҳ томонидан мактаб маъмурияти билан тушунтириш ишлари олиб борилди. Мактабда шундай вазиятга йўл қўйганлиги учун маънавий-маърифий ишлар бўйича директор ўринбосари Р.Ш. га ҳайфсан интизомий жазо чораси қўлланилди.
Аввалроқ Қўқон педагогика институтининг қизлар ётоқхонасига камера ўрнатилгани аниқланганди. Жараёнда иштирок этиб, хизмат вазифасини суиистеъмол қилган 4 нафар масъул ходим, жумладан, проректор эгаллаб турган лавозимидан озод этилиб, бир нафар мутахассисга интизомий жазо чораси қўлланилганди.
Изоҳ (0)