Тошкентнинг Юнусобод тез тиббий ёрдам подстанцияси фелдшери Злата Гафурова чақириқ бўйича эркак шифокорлар бригадасини юборгани учун беморнинг ўғли томонидан таҳдидга учраётгани тўғрисида хабар берилганди. Пойтахт ИИББнинг маълум қилишича, ҳолат юзасидан маъмурий иш қўзғатилган.
Қайд этилишича, 1 апрель куни 1990 йилда туғилган Н.Х. онасининг саломатлиги ёмонлашгани сабабли тез-тиббий ёрдам хизматига қўнғироқ қилиб, хабарни қабул қилган диспетчер 25 ёшли Злата Гафуровадан фақат аёл тиббиёт ходимларини юборишини сўраган. Диспетчер тез тиббий ёрдам кўрсатиш бўйича ички қоидаларда бундай талаб белгиланмаганини маълум қилиб, шу вақтда бўш аёл шифокорлар бригадаси бўлмагани сабабли, биринчи тиббий ёрдам кўрсатиш учун энг яқин бригадани юборган. Фуқаро манзилга етиб борган бригадада эркак шифокорларни кўриб, уларни уйга киритмай норозилик билдирган ҳамда телефон орқали диспетчерни ҳақорат қилган.
Мазкур ҳолат юзасидан Юнусобод тумани ИИО ФМБ ходимлари томонидан фуқаро Н.Х.га нисбатан Маъмурий жавобгарлик тўғрисидаги кодекснинг 41-моддаси (ҳақорат қилиш) билан маъмурий баённома расмийлаштирилиб, тўпланган ҳужжатлар якуний қарор қабул қилиш учун судга юборилган.
Маълумот учун, ушбу модда билан жавобгарликка тортилиш, базавий ҳисоблаш миқдорининг 20 бараваридан 40 бараваригача (12 миллион сўм) миқдорда жарима солишга сабаб бўлади.
Аввалроқ Тошкент шаҳар Бектемир туманида тез ёрдам машинасида олиб кетилаётган аёл тиббиёт ходимларига қаршилик кўрсатиб, салондаги жиҳозларни тепиб синдиргани тўғрисида хабар берилганди. Кейинроқ аёл спиртли ичимлик таъсирида бўлгани маълум қилинган эди.
Изоҳ (0)