Тошкент шаҳар Бектемир туманида тез ёрдам машинасида олиб кетилаётган аёл тиббиёт ходимларига қаршилик кўрсатиб, салондаги жиҳозларни тепиб синдиргани тўғрисида хабар берилганди. “Замон” информацион дастурида маълум қилинишича, аёл спиртли ичимлик таъсирида бўлган.
Хабарга кўра, 29 март куни соат 18:00 ларда уйидаги оилавий можаро сабабли қўлини кесган аёл — 1987 йилда туғилган Т.Т. тез тиббий ёрдам машинасида биринчи тиббий ёрдам кўрсатиш учун олиб кетилаётган вақтда ушбу ҳолатни содир этган. У Бектемир тумани, Ҳусайн Бойқаро кўчасида тиббиёт ходимларига қаршилик кўрсатиб, салондаги махсус жиҳозларни тепиб синдирган.
“Бордик, касални кўрдик. Қўли кесилган, қон кетиб ётибди. Биринчи ёрдам кўрсатдим, асептик боғлоқ қўйдим… Шифохонага олиб кетиш жарайонида, асабийлашиб, оёқ-қўли билан ҳамма ёқни уриб-тепди, ҳақоратли сўзлар билан сўкди. Аёлда озгина спиртли ичимлик таъсири кузатилди”, — дейди тез ёрдам ходими.
Ҳайдовчи фуқарони тинчлантириш мақсадида автомашинани тўхтатган вақтда аёл ёнидаги турмуш ўртоғи ва тиббиёт ходимларининг гапига қарамасдан, йўлнинг қатнов қисмига чиқиб кетган. Т.Т. транспорт воситалари ҳаракатланиши учун хавфли ҳолатни юзага келтириб, жамоат тартибини бузган, унга тиббий ёрдам кўрсатилишига қаршилик қилган. Ҳодиса жойига етиб келган ИИО ходимларининг аралашуви билан Т.Т. тиббиёт муассасасига олиб борилган.
Ҳозирда ҳолат юзасидан тергов ҳаракатлари бошланган. “Бектемир тумани ИИО ФМБ томонидан текширув ўтказилмоқда, текширув якуни бўйича қонуний қарор қабул қилиниши таъминланади”, — дейди пойтахт ИИББ ахборот хизмати раҳбари.
Изоҳ (0)