Қозоғистон ал-Ақсо масжидидаги ҳужумга муносабат билдирди

Қозоғистон Ташқи ишлар вазирлиги вакили Айбек Смадияров Исроил полициясининг ал-Ақсо масжидида фаластинликларга қарши ҳужумидан сўнг республиканинг бу бўйича позициясини билдирди. Бу ҳақда Tengrinews хабар берди.

Муносабатда Қозоғистон Яқин Шарқда муборак ал-Ақсо масжидига қилинган ҳужумлар муносабати билан кескинлик кучайиб бораётганидан хавотир билдирган.

“Ҳозирги вазиятда соғлом фикр ғалаба қозонишига ва томонлар вазминлик кўрсатиб, зўравонлик ва вазиятнинг янада ёмонлашувига олиб келадиган қадамлар, шунингдек, даъват қилиш ҳаракатларидан тийилишига умид билдирамиз”, — деди Смадияров. 

Унинг қўшимча қилишича, мазкур вазиятда статус-квога амал қилиш зарур.

“Умид қиламизки, сиёсий, диний ва жамоат раҳбарлари муқаддас Рамазон ойи ва Фисиҳ байрамида кескинликни камайтириш учун барча саъй-ҳаракатларини амалга оширади. Қозоғистон ҳар доим бағрикенглик ва динлараро мулоқотни мустаҳкамлаш тарафдори ва халқаро ҳамжамиятнинг БМТ Хавфсизлик кенгаши резолюцияларига мувофиқ Яқин Шарқ муаммосини тинч йўл билан ҳал этишга қаратилган саъй-ҳаракатларини қатъий қўллаб-қувватлайди”, — деди Смадияров.