Иордания Исроил кучларини Ал-Ақсо масжидига яна бостириб кириш оқибатидан огоҳлантирди

Иордания маъмурияти якшанба куни Исроилнинг провокациялари босиб олинган Шарқий Қуддусдаги Ал-Ақсо масжиди мажмуасини “жанг майдони”га айлантириши ҳақида огоҳлантирди. Бу ҳақда CNN хабар берди.

Иордания Ташқи ишлар вазирлиги агар Исроил полицияси “намозхонларни масжиддан чиқариш учун бостириб киришга тайёргарлик кўриш мақсадида яна ҳужум қилса, бу вазиятни янада кескинлаштириб, зўравонликка олиб келишини” билдирди. Вазирлик бунинг учун ҳамма товон тўлашини қайд этди.

“Исроил ҳукумати Қуддус ва Фаластиннинг барча босиб олинган ҳудудларида вазиятнинг кучайишига, шунингдек, муқаддас Ал-Ақсо масжидига бостириб киришни тўхтатмаса, вазиятнинг эҳтимолий ёмонлашиши учун жавобгардир”, — дейилади баёнотда.

Иорданиянинг огоҳлантиришидан сўнг 9 апрель куни Исроил Ташқи ишлар вазирлиги баёнот бериб, “Ал-Ақсо масжиди ичида тўсиқ ўрнатган одамлар Хамас ва бошқа террор ташкилотлари томонидан радикаллашган ва хавфли оломон” эканини айтди.

Исроил Ташқи ишлар вазирлиги Иорданиядан вақф қўриқчиларини “Мусулмонлар намоз ўқиётганда ғалаён уюштиришни режалаштирган экстремистларни зудлик билан Ал-Ақсо масжидидан олиб чиқишга” чақирган. Вақф Иордания томонидан тайинланган ва Ал-Ақсо масжиди мажмуасини бошқарадиган органдир.

5- ва 6 апрель кунлари Исроил кучлари Ал-Ақсо масжидидаги фаластинликларга ҳужум қилди. Полиция фаластинликларни тарқатишда электр токи гранаталари ва резина ўқлардан фойдаланган. Исроил ҳуқуқ-тартибот идоралари ўнлаб “вояга етмаган жиноятчилар” полицияга тош отаётгани, хавфсизлик кучлари эса тартибни тиклаш учун ҳаракат қилишга мажбур бўлаётганини иддао қилган.

Ливаннинг “Ҳизбуллоҳ” эронпараст қуролли ҳаракати Исроилга қарши мумкин бўлган “барча чораларни” қўллаб-қувватлаши ҳақида огоҳлантирган. Мазкур баёнот фонида Ливан ҳудудидан Исроилга ракеталар учирилган, Исроил ҳам бунга жавобан қарши авиаҳужумни амалга оширган.

АҚШ, Исроил, Ливан ва Ғазодан учирилган ракеталардан кейин ўзини ҳимоя қилиш ҳуқуқига эга эканини билдирган. Эрон президенти Иброҳим Раисий фаластинликларга қарши ҳужумни қоралаб, бунга қарши чора кўришга чақирган.

“Биз Ислом ҳамкорлик ташкилотининг фавқулодда йиғилишини ўтказиш ва Фаластин халқини ҳимоя қилиш учун қўшма резолюция қабул қилишга чақирамиз”, — деди Раисий.

7 апрелга ўтар кечаси Исроил армияси Ғазо секторига зарба берган. ОАВ хабар беришича, Исроил Ғазо секторидаги ҲАMAS ҳаракатининг позицияларига ҳужум қилган. Камида 10 та портлаш содир бўлган. Қурбонлар ҳақида маълумот йўқ. Ғазодан Исроилга учирилган жавоб ракеталари эса “Темир гумбаз” ҳаво ҳужумидан мудофаа тизими ёрдамида қайтарилган.