Тошкент шаҳрида уй олиб беришни ваъда қилиб, Туркия фуқаросини чув туширган эркакка нисбатан жиноят иши қўзғатилди. Бу ҳақда ИИВ ҳузуридаги Тергов департаменти хабар берди.
Маълум қилинишича, 2023 йилнинг январь ойида 33 ёшли К.Б. ўзганинг мулкини фирибгарлик йўли билан қўлга киритиш мақсадида ўзига олдиндан таниш бўлган Туркия фуқароси 39 ёшли З.Т.нинг ишончига кириб, унга Тошкент шаҳри марказидан хонадон олиб беришини айтган. У 50 минг долларга мўжазгина уй топганини, дастлабки тўлов сифатида банкдан ҳисобрақам очиб, январь ойида 10 минг доллар, кейинчалик март ойида 40 250 доллар олишга эришган.
Фуқаро К.Б. берган ваъдасини бажармай, пулларни ўз эҳтиёжлари учун сарфлаб юборган.
Ҳолат юзасидан Олмазор тумани ИИО ФМБ ҳузуридаги Тергов бўлими томонидан К.Б.га нисбатан Жиноят кодексининг 168-моддаси 4-қисми “а” банди (фирибгарлик) билан жиноят иши қўзғатилган.
“Жиноят иши доирасида жиноятнинг келиб чиқиш сабаблари ўрганилиб, ҳуқуқий баҳо берилиши таъминланади. Ҳозирда тергов ҳаракатлари олиб борилмоқда”, — дейилади хабарда.
Аввалроқ Тошкентда биржа орқали пулларни кўпайтириб беришини айтиб, фуқарони чув туширган эркак ушлангани, Наманганда 9 нафар фуқарони чув туширган “лицензия бўлими ходими” қўлга олингани тўғрисида хабар берилганди.
Изоҳ (0)