Toshkent shahrida uy olib berishni va’da qilib, Turkiya fuqarosini chuv tushirgan erkakka nisbatan jinoyat ishi qo‘zg‘atildi. Bu haqda IIV huzuridagi Tergov departamenti xabar berdi.
Ma’lum qilinishicha, 2023-yilning yanvar oyida 33 yoshli K.B. o‘zganing mulkini firibgarlik yo‘li bilan qo‘lga kiritish maqsadida o‘ziga oldindan tanish bo‘lgan Turkiya fuqarosi 39 yoshli Z.T.ning ishonchiga kirib, unga Toshkent shahri markazidan xonadon olib berishini aytgan. U 50 ming dollarga mo‘jazgina uy topganini, dastlabki to‘lov sifatida bankdan hisobraqam ochib, yanvar oyida 10 ming dollar, keyinchalik mart oyida 40 250 dollar olishga erishgan.
Fuqaro K.B. bergan vaʼdasini bajarmay, pullarni o‘z ehtiyojlari uchun sarflab yuborgan.
Holat yuzasidan Olmazor tumani IIO FMB huzuridagi Tergov bo‘limi tomonidan K.B.ga nisbatan Jinoyat kodeksining 168-moddasi 4-qismi “a” bandi (firibgarlik) bilan jinoyat ishi qo‘zg‘atilgan.
“Jinoyat ishi doirasida jinoyatning kelib chiqish sabablari o‘rganilib, huquqiy baho berilishi taʼminlanadi. Hozirda tergov harakatlari olib borilmoqda”, — deyiladi xabarda.
Avvalroq Toshkentda birja orqali pullarni ko‘paytirib berishini aytib, fuqaroni chuv tushirgan erkak ushlangani, Namanganda 9 nafar fuqaroni chuv tushirgan “litsenziya bo‘limi xodimi” qo‘lga olingani to‘g‘risida xabar berilgandi.
Izoh (0)