Тошкентда уй олиб беришни ваъда қилиб, Россия фуқаросини 52 миллион сўмга чув туширишди, дея хабар бермоқда Тергов департаменти.
Қайд этилишича, 2021 йилнинг 25 апрель куни Россия фуқароси 77 ёшли Ф.Р. Яккасарой тумани бўйича ИИО ФМБга ариза билан мурожаат қилиб, унда 2020 йилнинг июнь ойида таниши 40 ёшли С.А. Тошкент шаҳар ҳокимияти орқали уй сотиб олишида ёрдам беришини ваъда қилиб, Яккасарой тумани Шота Руставели кўчаси 62-уй олдида 52 миллион сўм пулларни алдов йўли билан қўлга киритиб, берган ваъдасини бажармаганлигини маълум қилган.
Мазкур ҳолат юзасидан Яккасарой тумани бўйича ИИО ФМБ ҳузуридаги тергов бўлими томонидан С.А.га нисбатан Жиноят кодексининг 168-моддаси 2-қисми «а» банди (фирибгарлик) билан жиноят иши қўзғатилган.
Ҳозирда тергов ҳаракатлари олиб борилмоқда.
Бундан аввал Тошкентда вафот этган боланинг суратини интернетга жойлаб, шу орқали хайрия пули тўплаган аёл ушлангани, Тошкент вилоятида танишлари орқали ИИВ тизимига ишга киритиб қўйиши учун 4,5 минг доллар талаб қилган шахс ушлангани ҳамда Шаҳрихонда каналнинг муҳофаза ҳудудидан қурилиш қилиш учун техник хулоса бериш эвазига 500 доллар олган масъул қўлга олингани ҳақида хабар берилганди.
Изоҳ (0)