Ўзбекистонда апрель ойи бўлишига қарамай, бозорлар ва савдо дўконларида тарвуз сотилмоқда. Харидорларни, аввало, ҳали ҳосили етилиб улгурмаган маҳсулотнинг нархи қизиқтириши тайин. “Дарё” айни вақтда Тошкент шаҳридаги бозорларда тарвуз неча пулдан сотилаётганини ўрганди. Савдогларнинг айтишича, 1 килограмм тарвузнинг ўртача нархи 35—40 минг сўм атрофида сотилмоқда.
“Тарвузлар Эрондан олиб келинмоқда. Ичлари яхши, сифати, мазаси зўр. Килосини 35 минг сўмдан сотяпман, улгуржи нархи эса 30 минг сўм. Сўйиб беряпман, қизил чиқса — олади, қизил чиқмаса — йўқ, шунақа шарти бор”, — дейди “Олой” бозоридаги сотувчилардан бири.
“Тарвузларни Эрондан олиб келяпмиз. Ҳали ўзимизда тарвуз пишгани йўқ, мавсум энди бошланади. Шунинг учун сўраганларга хориждан олиб келтиряпмиз. Нархлари ўзига қараб 25—35 минг сўм атрофида”, — дея маълумот берди “Чорсу” бозори савдогарларидан бири.
Бундан ташқари, бозорларда қулупнай ҳам юқори нархи билан ажралиб турибди. Сотувчиларнинг айтишича, ушбу маҳсулот нави ва шаклига қараб 100—150 минг сўм атрофида сотилмоқда.
Изоҳ (0)