Германия қонунчилари яқин ойларда хорижликларга мамлакат фуқаролигини олишни осонлаштирадиган қонун лойиҳасини кўриб чиқади. Бу ҳақда CNBC хабар берди.
Бунга сабаб эса мамлакатнинг қисқариб бораётган ишчи кучини кучайтиришга қаратилган иммиграция сиёсатидир.
Ташаббусга кўра, қонун лойиҳаси одамларга беш йилдан кейин фуқаролик олиш учун ариза топширишга имкон беради. Ҳозирда бу муддат саккиз йил.
Маҳаллий муҳитга интеграция қилиш учун катта саъй-ҳаракатларни амалга оширган, масалан, немис тилини ўзлаштирган чет элликларга уч йилдан кейин худди шундай ариза топшириш имкони берилади.
Бундан ташқари, қонун лойиҳаси Европа Иттифоқига кирмайдиган мамлакатлар фуқароларига қўш фуқаролик тақиқини бекор қилади. Агар қонун лойиҳаси қабул қилинса, улар Германия фуқаролигини олиш учун ариза топшираётганда ўз мамлакати фуқаролигидан воз кечиши шарт эмас.
Шунингдек, Канада балл тизимига асосланган ва малакали ишчиларнинг Германияга киришини осонлаштириш учун мўлжалланган иммиграция ислоҳоти ҳам кўриб чиқилади.
Бунда номзодлар Германияда тан олинган касбий малакага эга эканлигини исботлаши шарт бўлмайди — тегишли тажриба ва ваъда қилинган иш ҳақида маълумот талаб қилинади.
CNBC маълумотларига кўра, мамлакатда 10 миллионга яқин одам (Германия умумий аҳолисининг тахминан 12 фоизи) мамлакат паспортисиз яшайди.
Бу сайловларда овоз бериш ёки муайян лавозимларни эгаллаш ҳуқуқи каби асосий имтиёзларни истисно қилади.
Аввалроқ Германия муҳожирлар учун иммиграция қоидаларини соддалаштириши ҳақида хабар берилганди.
Изоҳ (0)