Европа Иттифоқи ўз аъзоларига Россиядан LNG импортини чеклаш имкониятини бермоқчи

Европа Иттифоқи аъзо давлатларга янги энергия санкцияларисиз Россиядан суюлтирилган газ (LNG) импортини тақиқлаш имкониятини изламоқда. Бу ҳақда Bloomberg хабар бермоқда. 

Агентлик маълумотларига кўра, вазирлар россиялик экспортчиларга LNG етказиб бериш учун зарур бўлган Европа давлатларининг инфратузилма қувватларини олдиндан захирага қўйишни вақтинча тақиқлаш ҳуқуқини берувчи ташаббусни маъқуллашга тайёр. 

Bloomberg’нинг таъкидлашича, таклиф Европарламент томонидан маъқулланса, кучга киради. Ташаббус муаллифлари Финляндия, Эстония, Латвия, Литва ва Польша бўлди, дея хабар беради агентлик.

9 март куни Еврокомиссия бозорни “ишончли” етказиб берувчилар учун бўшатиш мақсадида Россиядан LNG сотиб олиш бўйича шартномаларни узайтирмасликни таклиф қилди. 

Энергетика бўйича Европа комиссари Кадри Симсоннинг сўзларига кўра, Россиядан суюлтирилган газни харид қилишни давом эттириш европалик истеъмолчиларга “обрў-эътибор учун хавф” ҳисобланади. 

Россиянинг LNG учун амалдаги узоқ муддатли шартномалари 2030 йилдан кейин тугайди. 

Таҳлилчиларнинг фикрига кўра, Россия ўз LNG’сини Осиёнинг танқис бозорларига йўналтира олади ва LNG импортини тақиқлаш ғоясини амалда қўллаш қийин бўлади.