Germaniya qonunchilari yaqin oylarda xorijliklarga mamlakat fuqaroligini olishni osonlashtiradigan qonun loyihasini ko‘rib chiqadi. Bu haqda CNBC xabar berdi.
Bunga sabab esa mamlakatning qisqarib borayotgan ishchi kuchini kuchaytirishga qaratilgan immigratsiya siyosatidir.
Tashabbusga ko‘ra, qonun loyihasi odamlarga besh yildan keyin fuqarolik olish uchun ariza topshirishga imkon beradi. Hozirda bu muddat sakkiz yil.
Mahalliy muhitga integratsiya qilish uchun katta sa’y-harakatlarni amalga oshirgan, masalan, nemis tilini o‘zlashtirgan chet elliklarga uch yildan keyin xuddi shunday ariza topshirish imkoni beriladi.
Bundan tashqari, qonun loyihasi Yevropa Ittifoqiga kirmaydigan mamlakatlar fuqarolariga qo‘sh fuqarolik taqiqini bekor qiladi. Agar qonun loyihasi qabul qilinsa, ular Germaniya fuqaroligini olish uchun ariza topshirayotganda o‘z mamlakati fuqaroligidan voz kechishi shart emas.
Shuningdek, Kanada ball tizimiga asoslangan va malakali ishchilarning Germaniyaga kirishini osonlashtirish uchun mo‘ljallangan immigratsiya islohoti ham ko‘rib chiqiladi.
Bunda nomzodlar Germaniyada tan olingan kasbiy malakaga ega ekanligini isbotlashi shart bo‘lmaydi — tegishli tajriba va va’da qilingan ish haqida ma’lumot talab qilinadi.
CNBC ma’lumotlariga ko‘ra, mamlakatda 10 millionga yaqin odam (Germaniya umumiy aholisining taxminan 12 foizi) mamlakat pasportisiz yashaydi.
Bu saylovlarda ovoz berish yoki muayyan lavozimlarni egallash huquqi kabi asosiy imtiyozlarni istisno qiladi.
Avvalroq Germaniya muhojirlar uchun immigratsiya qoidalarini soddalashtirishi haqida xabar berilgandi.
Izoh (0)