Украина Ташқи ишлар вазирлиги Грузияда панжара ортида сақланаётган Украина фуқароси Михаил Саакашвилига нисбатан муносабатга кескин норозилик билдирди. Вазирлик сайтида тегишли баёнот эълон қилинди.
“Грузия ҳукумати Михаил Саакашвилига нисбатан психологик ва жисмоний зўравонлик қўлламоқда, унга шошилинч тиббий ёрдам кўрсатишни рад этилиб, сиёсатчи ҳаётига атайлаб хавф туғдирмоқда. Украина фуқаросига нисбатан инсон ҳуқуқларининг қўпол равишда бузилиши Тбилисининг Европа Иттифоқига аъзо бўлиш бўйича эълон қилган даъвосига зид келади ва Грузияда демократиянинг чекланишидан далолат беради”, — дейилади баёнотда.
Ташқи ишлар вазирлиги Грузия ҳукуматини Саакашвили устидан масхара қилишни зудлик билан бас қилишга ва уни Украинага топширишга чақирган. Шунингдек, вазирлик хорижий ҳукуматлар ва халқаро ташкилотларга Грузия ҳукумати томонидан сиёсий репрессиялар туфайли ҳаёти хавф остида қолган Украина фуқароси, Грузиянинг собиқ президентини очиқ ҳимоя қилишни сўраган.
Саакашвилини Грузияда ҳибсга олиш ва қийноқлар
2021 йил 1-октябрда Саакашвили саккиз йил ичида биринчи марта муниципал сайловлар арафасида Грузияга қайтганида ҳибсга олинган. У бир қанча жиноий ишларда, хусусан, 2005 йилда грузиялик собиқ депутат Валерий Гелашвилига ҳужум уюштирганликда айбланмоқда. Бунинг учун у аллақачон сиртдан олти йиллик қамоқ жазосига ҳукм қилинган.
Ҳибсга олингандан сўнг Саакашвили дарҳол очлик эълон қилган ва у 2021 йил 19 ноябрда очликни тўхтатишга рози бўлган. 29 ноябрь куни Саакашвили ҳибсга олинганидан кейин биринчи марта судга олиб борилган ва ҳибсда қийноққа солинганини айтган. У ўзига қўйилган айбловларни сиёсий таъқиб, ўзини эса сиёсий маҳбус деб билади.
Узоқ давом этган очлик эълонидан сўнг сиёсатчининг аҳволи оғирлашган, шу сабабли у Рустав қамоқхонасидан Горидаги ҳарбий госпиталга ўтказилган.
2022 йил декабрида Украина Ташқи ишлар вазирлиги ўша пайтда Тбилисидаги Vivaмеди тиббиёт марказида бўлган Саакашвилининг соғлиғи сезиларли даражада ёмонлашганидан чуқур хавотирда эканини билдирган.
2023 йилнинг 1 февралида Украина президенти Владимир Зеленский Грузия ҳукумати Саакашвилини “омма олдида қийноққа солиб, ўлдираётганини” айтди. Саакашвилининг ўзи эса Украинадаги уруш ғалабасигача яшай олмаса, юрагини Киевга дафн этишга чақирди.
Изоҳ (0)