Муолажа учун қамоқдан касалхонага ўтказилган Грузия собиқ президенти Михаил Саакашвили ўзининг аҳволи “ўлим ёқасида” эканини айтди. Бу ҳақда сиёсатчи Sky News’га адвокати орқали маълум қилди.
“Аввал 120 килограмм бўлганман, ҳозир бўлса 64, агар 60 дан камайсам, шифокорлар кўплаб аъзолар етишмовчилигини прогноз қилмоқда”, — дея унинг сўзларини келтиради телеканал.
Саакашвили, шунингдек, “суяклари емирилаётгани” сабаб “чидаб бўлмас оғриқ” хис қилаётганини айтди.
Собиқ президентнинг адвокати Шалва Хачапуридзенинг таъкидлашича, мижозининг аҳволи кундан кунга ёмонлашмоқда.
Телеканал билан ёзишмаларида Саакашвили Грузияда “хорижий агентлар” ҳақидаги қонун лойиҳасига қарши намойишчиларга мурожаатида уларни “ўта ҳушёр бўлишга” чақирди.
Ҳукмрон “Грузия орзуси” партияси Саакашвилига етарлича ёрдам берилаётгани, соғлиғи билан боғлиқ муаммолар сиёсатчининг нормал овқатланишдан бош тортиши сабабиданлигини билдирган.
Саакашвили 55 ёшда. У 2007 йилдан 2013 йилгача Грузия президенти бўлган. Кейинчалик у Украинага кўчиб ўтиб дастлаб президент маслаҳатчиси, кейин Одесса вилояти раҳбари бўлиб ишлади.
Сиёсатчи 2021 йилги муниципал сайловлар олдидан Грузияга қайтгач ҳибсга олиниб, қамоққа жўнатилди. Собиқ президентга нисбатан мансаб ваколатини суиистеъмол қилиш, собиқ депутатни калтаклаш ва давлат маблағларини ўзлаштириш каби жиноят ишлари қўзғатилган.
Саакашвили ҳибсга олинганидан кейин аҳволи ёмонлашгани ҳақида хабар берди. Франция президенти Эммануэль Макрон Тбилисини собиқ президентни озод қилишга чақирди. Украина раҳбари Владимир Зеленский Саакашвили туфайли Грузия ҳукуматини танқид қилди.
6 февраль куни Тбилиси суди Саакашвилини озод қилишдан бош тортди.
Изоҳ (0)