Буюк Британия Қироллик ҳаво кучлари ва Германия қирувчи самолётлари Эстония ҳаво ҳудудида Россия самолётини биринчи қўшма операцияда тутиб олди. Бу ҳақда BBC хабар берди.
14 март куни Санкт-Петербург ва Калининград ўртасида парвоз қилаётган Ил-78 “Мидас” самолётини тутиш учун иккита “Тайфун” самолёти кўтарилди. Россия самолёти Эстония ҳаво ҳаракатини бошқариш хизматини огоҳлантирмагани қайд этилган. Айни пайтда Британия ва Германия ҳарбий-ҳаво кучлари НАТО ҳаво кенгликларида режали ҳамкорликда хавфсизликни таъминламоқда.
“Самолётни тутиш одатий ҳол эди, бироқ бундай операция икки давлат томонидан биринчи марта биргаликда амалга оширилди”, — дейилади хабарда.
Воқеа Россиянинг Украинага бостириб кириши муносабати билан НАТО ва Россия ўртасида кескинлик кучайган бир пайтда содир бўлди. Бунинг 14 март куни Қора денгиз узра Россия қирувчи самолёти ва АҚШ дрони тўқнашгани ҳақидаги хабарга ҳеч қандай алоқаси йўқлиги айтилмоқда.
Россиянинг “Мидас” самолётидан сўнг иккита самолёт Эстония ҳаво ҳудудига яқин масофада учаётган Ан-148 лайнерини тутиб олиш учун йўналтирилган.
Эслатиб ўтамиз, 14 март куни Қора денгиз осмонида Россия самолётлари АҚШ дронини уриб туширгани ҳақида хабар берилди. Россия Мудофаа вазирлиги эса бу маълумотни рад этган ва ҳолат бўйича баёнот берган. АҚШ Департаменти эса ҳолат юзасидан Россия билан музокара олиб бориш кераклигини билдирган. АҚШ Қора денгизга қулаган дрони “бегона қўлларга тушмаслиги” учун зарур чоралар кўрган.
Изоҳ (0)