АҚШ Қора денгизда чўкиб кетган Америка дрони “бегона қўлларга тушиб қолмаслиги” учун зарур чоралар кўрди, деди Оқ уй Миллий хавфсизлик кенгашининг стратегик алоқалар бўйича координатори Жон Кирби CNN телеканалига.
“Қўшма Штатлар мулкимизни ҳимоя қилиш учун чоралар кўрди. Шубҳасиз, биз уни биздан бошқа биров олишини истамаймиз”, — деди Кирби. Айнан қандай чоралар кўрилганини Оқ уй вакили изоҳламади.
14 март куни АҚШ ҳарбийлари МQ-9 Reaper дрони Қора денгиз устида Россиянинг Su-27 қирувчи самолёти билан тўқнашиб кетганини хабар қилди. АҚШ ҳарбийларига кўра, самолёт дронни уриб туширган. Россия Мудофаа вазирлиги қирувчи ва дрон ўртасида алоқа бўлмаганини даъво қилмоқда. “Дрон кескин манёврлар туфайли баландликни йўқотиб назоратсиз парвоз қилди ва сув юзасига урилди”, — деб тушунтирди улар.
New York Times газетаси юқори мартабали ҳарбий амалдорга таяниб, МQ-9 Reaper Руминиядаги базадан режалаштирилган топшириқни бажариш учун кеча эрталаб ҳавога кўтарилганини, унда қурол йўқлигини ёзди. Оқ уй АҚШ президенти Жо Байден воқеа юзасидан хабардор қилинганини билдирган. Давлат департаменти бу борада Россия билан музокара олиб бормоқчи. Ўз навбатида, АҚШ Россиянинг Вашингтондаги элчисини Қора денгиздаги дрон билан боғлиқ ҳодиса туфайли Давлат департаментига чақирган.
Изоҳ (0)