Канада аэропортида қозоғистонлик журналистлардан қази ва бошқа гўшт маҳсулотлари олиб қўйилди

Монреаль аэропортида халқаро чанғичи-журналистлар клуби йиғилиши иштирокчилари нохуш вазиятга тушиб қолди. Божхонадаги қозоғистонлик журналистлар чет эллик ҳамкасблари учун ўзлари билан олиб келган барча егуликлар олиб қўйилди. “Время” газетаси муҳаррири ўринбосари Ирина Баженова “Дарё”нинг Қозоғистондаги мухбири билан суҳбатда тафсилотларни айтиб берди.

“Канададаги халқаро чанғичи-журналистлар клуби йиғилишига учдик. Одатда ҳар бир мамлакат вакиллари ўз маҳсулотларини олиб келиб, маҳаллий байрамда бир-бирларини миллий таомлар билан сийлашади. Биз дастлаб Канададаги ташкилотчилардан озиқ-овқат олиб бориш мумкинми, деб сўрадик. Улар бизга қоидалар ёзилган сайт ҳаволасини юборди ҳамда қисқача айтганда вакуумда, қадоқланган ва сертификатга эга ҳамма нарса мумкинлигини айтишди”, — деди Ирина.

Журналист веб-сайтдаги чекловларни ўқимаганини тан олди.

“Чунки сайт жуда мураккаб, уни тушуниш осон эмас. Биз шундай қарорга келдик: улар бизга импорт қоидаларини шу тарзда тушунтирдими, демак ҳаммаси яхши. Барча турдаги қуритилган гўшт маҳсулотларини — гўштли чипслар, бастурма, вакуумли қадоқдаги қазиларни олдик. Иримшик, ёнғоқ, қозоқ шоколади ва бренди ҳам бор эди. Ҳаммаси 3,5 килограмм бўлди. Чегарада офицер декларация қилинадиган бирор нарса бор-йўқлигини сўраганида, йўқ дедик. У яхшилаб ўйлаб кўринг, агар декларацияланмаган маҳсулотларни топсак, катта жарима бўлади, деб қўшимча қилди. Ўйлаб кўргач, миллий ноз-неъматлар борлигини ёздик”, — дея аниқлик киритди суҳбатдош.

Шундан сўнг, Баженованинг сўзларига кўра, улар чегара назоратидан ўтиб, чамадонларини олиб чиқиш йўлаги томон юрган.

“Тўсатдан бизни ўраб олишди. Ҳали қоғозни (декларация – таҳр.) кўрсатмагандик, учовимизни ўраб олишди ва чамадонимизни кўрсатишимизни сўрашди. Чамадонларни бирин-кетин тита бошлашди, кийимларни, барча сумкаларни текширишди. Ёнғоқ, ширинликлар, спиртли ичимликлар — буларнинг барчаси мумкин, деб айтишди. Гўшт эса бутунлай тақиқланган экан. Биз бу қуритилган, вакуумга солинганини айтдик сертификатни кўрсатдик! Лекин улар бунга ҳатто қарамади ҳам. Айтишича, фақат Европадан гўшт келтиришга рухсат берилган экан. Қозоғистон ва Осиёдан ветеринария сабабларига кўра рухсат берилмаган. Улар ҳамма нарсани олиб қўйишди. Божхоначига бизда декларация қилинадиган нарса бор деб бекор айтибмиз, индамай ўтиб кетишимиз керак эди десам, итларимиз барибир ҳидини оларди, деди. Агар ёзмаганингизда, ҳибсга олинган бўлардингиз. 1300 доллар жарима тўлардингиз деди”, — ҳикоясини давом эттирди қозоғистонлик журналист.

Ирина ҳеч қандай итни кўрмаганини айтди, лекин божхона ходими улар борлигини айтган. Қозоғистонлик журналистлар қанча ялинмасин, уларга гўштни олиб ўтишга рухсат беришмаган, егуликларни шу ерда тановул қилиши мумкинлигини айтган. Журналистлар оз миқдорда ея олган.

“Гўшт ва егуликларга салкам 40 минг тенге сарфлагандик. Айниқса, қазини кўз ўнгимизда қандайдир идишга ташлагани жуда ачинарли. Қолган божхоначилар тўплана бошлашди. Биз ўйладик: эҳтимол, кейин барча маҳсулотлар бу идишдан олиниб, уларнинг ўзи бизнинг таомлар билан овқатланишар. Канада божхоначиларига ёқимли иштаҳа”, — дея сўзини якунлади Баженова.