Колумбия Ҳарбий-денгиз кучлари зобитлари бортида бир тоннадан ортиқ кокаин бўлган сувости кемасини қўлга олди. Бу ҳақда Fox News республика ҳарбийларига таяниб хабар берди.
Марказий Америкага кетаётган сувости кемасида баҳоси 87 миллион долларга яқин 1 367 килограмм кокаин бўлган. Тахминан 15 метр узунликдаги сувости кемасида авария юз берган, оқибатда ёнилғидан заҳарли газлар ажралиб чиққан. Икки гумонланувчи ҳалок бўлган, яна икки киши оғир жароҳатланган.
Март ойи бошида банан солинган контейнерларга яширилган 8,8 тонналик кокаин партияси Эквадор полицияси томонидан ушланган эди. Полиция бошлиғи Фаусто Салинаснинг сўзларига кўра, агар гиёҳванд моддалар ўз манзилига етиб борганида, наркосавдо билан шуғулланувчилар уни сотишдан 330 миллион доллардан кўпроқ даромад олиши мумкин эди.
Сўнгги йилларда Эквадор наркокартелларнинг логистика занжирларида Жанубий Американинг асосий транзит мамлакатларидан бирига айланди. Қўшни Перу ва Колумбияда ишлаб чиқарилган кокаин мунтазам равишда Эквадор портларидан топилмоқда. Биргина 2022 йилда маҳаллий полиция 200 тоннадан ортиқ А тоифали гиёҳванд моддаларни мусодара қилди.
Изоҳ (0)