АҚШнинг Демократик ва Республикачи партияларидан саккиз нафар сенатор Пентагонга мурожаат қилиб, Украина Қуролли кучларини замонавий Ф-16 қирувчи самолётлари билан таъминлаш имкониятини ўрганишни талаб қилди. Бу ҳақда Politico ва Fox News ёзмоқда.
Мурожаат муаллифларининг ёзишича, Россия ва Украина ўртасидаги уруш ҳозир “муҳим босқичда”, қирувчиларни олиш “Украина Қуролли кучларига жанг майдонидаги ўйин қоидаларини ўзгартириш учун муҳим имконият беради”.
Сенаторлар АҚШ мудофаа вазири Ллойд Остиндан қирувчиларни жўнатиш бўйича ижобий қарор қабул қилиш учун зарур бўлган турли омилларни ушбу ҳафта охиригача баҳолашни талаб қилди. Хусусан, Ф-16 таъминотининг можаро ривожланишига таъсири, украиналик учувчиларни ўқитишга кетадиган вақт, Киевнинг бошқа қуролларга нисбатан қирувчи самолётларни олишга қизиқиши даражаси, шунингдек, қирувчиларни қандай: нолдан ишлаб чиқарибми ёки заҳиралардан олиб етказиб бериш эҳтимоли баҳоланиши керак.
“Европада тинчлик ва хавфсизликни тиклаш учун Қўшма Штатлар иттифоқчиларимиз билан ҳамкорликда Украинанинг саъй-ҳаракатларини қандай қилиб энг яхши тарзда қўллаб-қувватлашимиз мумкинлигини доимий равишда баҳолаб бориши керак”, — деб хулоса қилди сенаторлар.
АҚШ сенаторлари бир неча бор сиёсий ва ҳарбий раҳбариятни Украинага замонавий қирувчи самолётларни топширишга чақирган.
Аввалроқ Оқ уй АҚШ бошқа давлатларнинг Украинага қирувчилар беришини олқишлаши, бироқ Америка ҳукуматининг ўзи бундай ёрдамни ваъда бермаслиги ҳақида маълум қилганди.
АҚШ президенти Жо Байден ABC каналига берган интервьюсида “Украинага ҳозир Ф-16 қирувчилари керак эмас” деган. Кейинроқ АҚШ президентининг миллий хавфсизлик бўйича маслаҳатчиси Жейк Салливан Байденнинг сўзларини тушунтириб, Оқ уй урушда Украинанинг шошилинч эҳтиёжларини биринчи ўринга қўйиб келаётганини таъкидлади. “Ҳозирги босқичда муҳим элемент ерда манёврларни амалга ошириш қобилиятидир. Ва бу танклар, бронетранспортёрлар, пиёда жанговар машиналарни англатади”, — деди Салливан.
The New York Times газетасининг ёзишича, АҚШ президенти маъмурияти Ф-16 самолётларини учинчи давлатлар, жумладан, Дания ёки Нидерландия орқали Киевга топширишни истисно этмаган. 10 февраль куни Украина ҳукумати Нидерландияга Ф-16 қирувчиларини сўраб ариза юборди.