Саломатлик нафақат турмуш тарзига, балки умр кўриш давомийлигига ҳам боғлиқ. Албатта, тўғри овқатланиш ва соғлом турмуш тарзи сизни бахтсиз ҳодисалардан кафолатлай олмайди. Аммо бу омиллар хавфли ва потенсиал ўлимга олиб келувчи касалликларнинг ривожланиш хавфини камайтириши мумкин. Шундай қилиб кундалик одатларингизни қайта кўриб чиқинг ва қуйидаги одатлардан бирортаси сизга таниш бўлса, улардан ҳеч иккиланмай воз кечинг, деб ёзмоқда “Новий очаг” нашри.
Кечаси овқатланиш
Ярим тунда музлаткичга мўралаб қараш ва мазали (ва кўпинча зарарли) нарсаларни ейиш одати нафақат вазнингиз, балки соғлиғингиз, ҳатто ҳаётингиз учун ҳам хавфлидир. Биринчидан, бу кечки егуликлар глюкозанинг хавфли даражада кўтарилишига олиб келади, инсулин бардошлилигига таъсир қилади, бу эса 2-тоифа диабет хавфини сезиларли даражада оширади. Иккинчидан, тунги овқат истеъмол қилиш қонда юрак-қон томир касалликларининг ривожланиш хавфини оширадиган хавфли ёғлар — триглицеридлар даражасини оширади.
Кеч ухлаш
Севимли фильмингизнинг бошқа эпизоди ёки дўстларингиз билан суҳбат қуриб ўтириш учун уйқуни қурбон қилсангиз, соғлиғингизни хавф остига қўясиз. Уйқусизлик жуда зарарли, тунги дам олишнинг сурункали етишмаслиги юрак хасталикларидан тортиб саратонгача бўлган турли касалликлар ривожланиш хавфини оширади. Бундан ташқари, уйқусиз тундан кейин концентрацияни йўқотиш, агар машина ҳайдасангиз ёки хавфли ускуналар билан ишласангиз, салбий оқибатларга олиб келиши эҳтимолдан холи эмас.
Тузни меъёрдан ортиқ истеъмол қилиш
Барча ўлимларнинг деярли 10 фоизи тузни ортиқча истеъмол қилиш билан боғлиқ. Бундан ташқари, рациондаги жуда кўп ёки жуда кам туз юрак хасталиклари, инсулт ва 2-тоифа диабет касалликларидан келиб чиқадиган ўлим ҳолатларининг 45 фоизига сабаб бўлади. Таомномадаги туз даражасини назорат қилинг — ҳаётингиз том маънода унга боғлиқ.
Қўлни ювмаслик
Кўчадан қайтганимиздан кейин, овқатланишдан олдин, ҳожатхонадан сўнг қўлни ювиш лозимлиги ҳақида чақириқни шунчалик кўп эшитганмизки, буни кўпинча муҳим нарса сифатида қабул қилмаймиз. Аммо ким нима дейишидан қатъи назар, атрофимиздаги дунё ҳақиқатан ҳам хавфли микробларга тўла. Қўл ювиш соғлиқни ҳимоя қилишнинг энг осон ва ишончли усули бўлиб қолмоқда. Бепарволик қилманг!
Тиш учун махсус иплардан фойдаланмаслик
Ўқиб ҳайрон қоласиз. Лекин мунтазам равишда тишни иплар билан тозалаш умр кўришни олти йилга узайтириши мумкин. Гап шундаки, тиш иплари касалликлар ва милклар яллиғланиши билан курашишга ёрдам беради. Шу билан бирга, хавфли касалликларнинг ривожланишига сабаб бўлиши мумкин бўлган бактерияларнинг қонга киришининг олдини олади. Шундай экан, тиш ва милкларингизнинг соғлиғини кузатиб боринг. Тиш ипларига нафақат кўзни қамаштирувчи табассумингиз боғлиқ, балки соғлиғингиз ҳам!
Нонуштани ўтказиб юбориш
Нонушта куннинг энг муҳим таомидир ва уни ҳеч қачон ўтказиб юбормаслик керак. Тадқиқотлар мунтазам равишда нонушта қилмаслик ва диабет, юрак-қон томир касалликлари хавфи ўртасидаги боғлиқликни тасдиқлайди. Бундан ташқари, нонушта бизни кун давомида тўйимлиликни ҳис қилишимизга, зарарли қўшимча егуликлардан қочишимизга ёрдам беради. Ва бу саломатлик учун, балки чиройли қомат учун ҳам фойдалидир.
Мавзуга доир:
Изоҳ (0)