Шубҳали холлар, қизариб кетган кўзлар, ҳатто ортиқча терлаш — буларнинг барчаси имкон қадар тезроқ шифокор билан учрашиш учун сабабдир. Дерматолог жиддий касалликларнинг бошланишини аниқлайди, ушбу хасталикларнинг аксарияти нафақат терига, балки бошқа тана аъзоларига ҳам салбий таъсир кўрсатади. Қуйидаги аломатларнинг қайси бири сизда содир бўлаётганини пайқасангиз, иложи борича тезроқ шифокорга учранг.
Шубҳали холлар
Деформацияланган, ассиметрик, ғалати рангли, беўхшов қирралари, гўёки терининг юзасидан кўтарилган холлар ҳақиқий “қизил байроқлар” бўлиб, улар орқали организм бизни хавфдан огоҳлантиради. Меланомадан ташқари ўзингизда бундай шаклланишларни сезсангиз, имкон қадар тезроқ шифокорга мурожаат қилинг.
Қизарган, қичийдиган кўз қовоқлари
Кўз қовоқлари атрофида қизариш ва қичишиш — бу энг кенг тарқалган кўз инфекцияси бўлган конюнктивитнинг биринчи белгисидир. Ушбу аломатни нега дерматолог даволайди, деб ҳайрон бўляпсизми? Гап шундаки, бактериялар кўз қовоқларининг нозик терисига таъсир қилади ва дерматолог тўғри даволаниш тартибини танлай олади.
Тузалиши учун жуда кўп вақт талаб қиладиган яралар
Яра бир ой ёки ундан кўпроқ вақт давомида тузалмаса, албатта, дерматологга мурожаат қилишингиз керак. Биринчидан, ҳеч қандай чоралар кўрилмаса, зарарланаган тўқималарда чириш бошланиши мумкин. Иккинчидан, бундай “узоқ давом этадиган” яралар баъзан тери саратони белгиси ҳисобланади.
Теридаги ҳар қандай ўзгаришлар
Узоқ вақт давомида ўтиб кетмайдиган теридаги ҳар қандай ўзгаришлар дерматологга кўрсатилиши керак: ҳуснбузар, пигментли доғлари, қорайиш, бошқа неоплазмалар — буларнинг барчаси жиддий касалликнинг белгиси бўлиши мумкин.
Оғиздаги яралар
Оғиз бўшлиғида узоқ вақт кетмайдиган ёки қайта-қайта пайдо бўладиган яралар имкон қадар тезроқ шифокорга учраш учун сабабдир. Бу овқат ҳазм қилиш тракти касалликлари, оғиз бўшлиғи касалликлари, ҳатто саратон белгиси бўлиши эҳтимолдан холи эмас. Қандай бўлмасин, уларни шифокорга кўрсатиш зарур.
Ўта қуруқ тери
Кўрилган барча чораларга қарамай, терингиз қуруқ ва ранги хира тортиб қолса, дерматологга мурожаат қилинг. Бу экзема ёки псориаз касаллиги ривожланишининг биринчи аломати бўлиши мумкин. Бундан ташқари, ҳаддан ташқари қуруқ тери ички органларнинг ишлашидаги бузилишларни кўрсатади.
Терлаш
Гормонал номутаносиблик, қалқонсимон без касалликлари, ҳатто диабет касаллиги ҳам ортиқча терлашга олиб келади. Агар одатдагидан кўпроқ терлаётганингизни сезсангиз, кучлироқ антиперспирант сотиб олишга шошилманг — аввал шифокор билан маслаҳатлашинг.
Тирноқларнинг ўзгариши
Тирноқларнинг мўртлиги, қичишиши, ранги ўзгариши ёки синиб кетиши кузатилганда шифокорга учранг. Тирноқлар ҳолатидаги бундай ўзгаришлар витаминлар етишмаслиги, жигар ва буйраклардаги бузилишлар ёки псориазнинг ривожланиши туфайли юзага келиши мумкин. Ушбу сигналларни ўтказиб юборманг!
Соч тўкилиши
Одатда кунига 80 тагача соч тўкилади. Аммо тароғингизда уларнинг сони сезиларли даражада кўп бўлса, шампунни алмаштиришдан аввал шифокор маслаҳати муҳимроқдир. Яхши томони, соч тўкилишининг кўпгина сабабларини даволаш мумкин. Сочларингиз ҳажми ортиб, соғлом бўлади.
Мавзуга доир:
Изоҳ (0)