Жаҳон соғлиқни сақлаш ташкилоти (ЖССТ) туз истеъмолини камайтириш зарурлиги ҳақидаги биринчи глобал ҳисоботни эълон қилди. Дунёдаги давлатларнинг атиги 5 фоизи бунга амал қилади.
![](/static/2023/zulfiya/photo_2023-03-10_19-46-34.jpg)
Дунёда бир киши кунига ўртача 10,8 грамм туз истеъмол қилади. Бу меъёрдаги кунлик 5 грамм туздан (бир чой қошиқ) икки баравар кўпдир.
“Ҳисобот шуни кўрсатадики, аксарият мамлакатлар натрий истеъмолини камайтириш бўйича мажбурий чоралар кўрмаган, бу эса аҳоли орасида юрак хуружи, инсулт ва бошқа муаммоларни келтириб чиқариши мумкин”, — деди ЖССТ
Натрийни кўп истеъмол қилиш ҳамда ошқозон саратони, семизлик, остеопороз ва буйрак касаллиги хавфи ўртасидаги боғлиқликни тасдиқловчи далиллар кўпаймоқда. ЖССТ маълумотларига кўра, бугунги кунда ташкилотга аъзо давлатларнинг атиги 5 фоизи ва бу фақат тўққизта давлат — Бразилия, Чили, Чехия, Литва, Малайзия, Мексика, Саудия Арабистони, Испания ва Уругвай — натрий миқдорини мажбурий камайтириш сиёсатини юритади. Бироқ, мамлакатларнинг 73 фоизи бундай сиёсатларнинг тўлиқ тўпламига эга эмас.
ЖССТ натрий миқдорини мажбурий камайтириш сиёсатини қисман амалга оширувчи давлатлар қаторига Беларусь, Украина ва Ўзбекистонни киритди. Арманистон, Тожикистон ва Қирғизистондаги вазият эса ёмонлиги, сабаби расмийлар ҳозирча фақат чора кўришга ваъда бергани айтилди.
ЖССТ тавсиялари
Ҳисобот муаллифлари мамлакатларга қуйидаги ҳаракатларни амалга оширишни тавсия қилади:
- туз миқдорини камайтириш учун озиқ-овқат таркибидаги натрий миқдорини белгилаш;
- давлат идоралари, шифохоналар, мактаблар ва қариялар уйларига туз ёки натрийга бой озиқ-овқат маҳсулотларини етказиб беришни чекловчи давлат харидлари сиёсатини ишлаб чиқиш;
- истеъмол товарларининг олд томонида истеъмолчиларга кам натрийли озиқ-овқатларни танлаш имконини берадиган мажбурий маркалаш тўғрисидаги қонунларни жорий этиш;
- туз ва натрий истеъмолини камайтиришга қаратилган ахборот кампанияларини ўтказиш.
Изоҳ (0)