Тошкентнинг Яшнобод туманида оғир аҳволда шифохонага олиб келингач вафот этган беморнинг фарзандлари тез тиббий ёрдам ходимларини калтаклагани ҳақида хабар берилган эди. Тошкент шаҳар ИИББ матбуот хизмати тиббиёт ходимларини калтаклаган шахсларга нисбатан жиноят иши қўзғатилганини маълум қилди.
Пойтахт ИИББ маълумотларига кўра, 18 февраль куни соат 23:50 ларда Яккасарой туманидаги, И.Иргашев номидаги 4-сонли шаҳар клиник шифохонасидаги изолятор хонасида 28 ёшли Ф.М. шахси аниқлаштирилаётган икки нафар танишлари билан қўл ва оёқлари ёрдамида тез тиббий ёрдам бўлими 3-сонли подстанция шифокори 31 ёшли Д.У. ва фельдшер 20 ёшли А.А.га тан жароҳати етказган.
«Содир этилган жиноятнинг сабаби ўрганилганда, Ф.М. шифокорларнинг ўз ишига совуққонлик билан ёндашганлиги сабабли онаси Д.Н.нинг ўлими юз берган деган фикрда бўлганлиги аниқланган. Марҳум Д.Н. юқорида қайд этилган касалхонага тез тиббий ёрдам машинасида клиник ўлим ҳолатида олиб келинган», — дейилади хабарда.
Воқеа оқибатида иккала тиббиёт ходими турли даражадаги тан жароҳатлари олган. ССВ матбуот хизмати 20 февралда жабрланган тиббиёт ходимларининг аҳволи оғирлигича қолгани ва уларга махсус жарроҳлик амалиётига тиббий кўрсатма борлиги сабабли Республика шошилинч тиббий ёрдам илмий марказига ўтказилганини маълум қилганди.
Ҳолат юзасидан Жиноят кодексининг 277-моддаси (безорилик) аломатлари билан жиноят иши қўзғатилган. Тергов давом этмоқда.
Бундан аввал Жиззахда тиббиёт ходими калтаклангани, Сирдарёда 6 нафар маст фуқаро тез ёрдам ходимларини калтаклагани ҳамда Фарғонада тез ёрдам ходимларини калтаклаган шахс қамоққа олингани ҳақида хабар берилган эди.
Изоҳ (0)