Фарғона вилоятининг Риштон туманидаги хонадонларнинг бирига чақирув асосида борган тез ёрдам шифокори беморнинг яқинлари томонидан калтакланди, дея хабар берди «Дарё» мухбири.
2022 йилнинг 12 ноябрь куни соат 04:08 да Риштон туманининг «Оқтом» маҳалласида яшовчи фуқародан тез ёрдамга чақирув келиб тушган. Тез тиббий ёрдам шифокорлари бригадаси чақирув асосида белгиланган манзилга етиб борган ва беморга биринчи ёрдам кўрсатган.
Шундан сўнг, беморнинг аҳволи оғирлиги учун тез ёрдам машинасида туман тиббиёт бирлашмасининг қабул диагностика бўлимига олиб келинган. Кўрсатилган тиббий муолажаларга қарамасдан бемор шифохонада вафот этган.
Бу ҳолатдан асабийлашган беморнинг яқинлари ва 54 ёшли тез ёрдам шифокори Б.З. ўртасида келишмовчилик келиб чиққан. Оқибатда беморнинг яқинлари шифокорни калтаклаган.
Олган жароҳатлари натижасида шифокор Риштон тумани тиббиёт бирлашмаси шошилинч тез тиббий ёрдам травматология бўлимига бош мия ёпиқ жароҳати, бош мия чайқалиши, ўнг қош соҳаси йиртилган жароҳати, кўз олмаси контузияси ташхиси билан ётқизилган. Айни пайтда даво муолажалари давом эттирилмоқда.
«Дарё» мухбири мазкур воқеа тафсилотларини ўрганмоқда.
Мавзуга доир:
Изоҳ (0)