Андижонда икки ой давомида тезликни ошириш орқали 26 маротаба қоида бузган ҳайдовчи 28 миллион сўмдан ортиқ жарима тўлади. Бу ҳақда “Дарё”га МИБнинг Андижон вилояти бошқармаси ахборот хизмати хабар берди.
Бюронинг Андижон шаҳар бўлими давлат ижрочиси Раҳматилло Солиевнинг айтишича, Андижон шаҳрида яшовчи фуқаро Б.И. 2022 йилнинг 20 октябридан 28 декабрига қадар ўз автомобилида ҳаракатланаётган вақтида йўлларда белгиланган ҳаракат тезлигини ошириб, жами йигирма олти маротаба қоидабузарлик содир этган. Натижада қоидабузарликлар бўйича маъмурий жарималар қўлланган бўлиб, уларнинг миқдори жами 28 миллион 170 минг сўмга етган. Бу бўйича ҳайдовчи бир неча маротаба огоҳлантирилган. Бироқ у жарималарни тўламасдан, қасддан бўйин товлаб келган.
Жарималарни ундириш мақсадида бюронинг Андижон шаҳар бўлими ходимлари томонидан фуқаро Б.И. билан тушунтириш ишлари олиб борилиб, қўлланган жарима пуллари тўлиқ ундирилган.
Қайд этиш лозим, Маъмурий жавобгарлик тўғрисидаги кодекснинг 128-3-моддасида транспорт воситалари ҳайдовчиларининг белгиланган ҳаракат тезлигини ошириб юборишига жарима солиниши белгилаб қўйилган. Шунингдек, ушбу моддада ҳайдовчи ҳаракат тезлигини оширганлик бўйича бир йилда бир неча бор ҳуқуқбузарлик содир этиб, унга нисбатан маъмурий жазо қўлланган бўлса, транспорт воситасини бошқариш ҳуқуқидан бир йилдан икки йилгача бўлган муддатгача маҳрум этилиши назарда тутилган.
Изоҳ (0)