Ўзбекистонда дизайни бўйича ягона дейилган Андижондаги кутубхона электрдан қарздорлиги сабаб фаолиятини тўхтатгани айтилмоқда

Ижтимоий тармоқларда Андижон вилоятининг Марҳамат туманида Ўзбекистонда дизайни бўйича ягона экани айтилган, тадбиркор томонидан қурилиб, аҳоли фойдаланиши учун текинга берилган замонавий кутубхона электр энергиядан қарздорлиги сабаб фаолият кўрсатмаётгани хабар қилинди. Хусусан, Facebook фаоли Исроил Тиллабоев шахсий саҳифасида бу ҳақда бир ўқитувчи ёзганини айтиб, бундан хафа бўлганини билдирди.

“Дарё” мухбири ҳолат ҳақида кенгроқ маълумот олиш мақсадида Марҳамат туманида бўлиб, тадбиркор вакили ҳамда мутасаддилар билан учрашиб, жамоатчиликнинг саволларига жавоб излади.

Тадбиркорнинг иш бошқарувчиси Жасурбек Рўзиматовнинг айтишича, кутубхона 60 минг нусха босма ҳамда 300 мингга яқин электрон китоб фондига эга бўлиб, 2021 йил июль ойида фойдаланишга топширилган. Жорий йилги аномал совуқ туфайли кутубхона ва шахмат мактаби биноларининг том қисмида ёриқлар пайдо бўлиши натижасида юз берган ёғингарчиликлар оқибатида электр тармоқларига зарар етган. Шу сабабли кутубхона фаолияти вақтинча тўхтатилиб, ахборот ресурс маркази бошқа ерга кўчирилган.

“Кутубхонамиз 2021 йил июль ойида фойдаланишга топширилган. Ушбу даврдан бери, яъни август ойидан давлат кутубхонаси ходимлари билан биргаликда ишлаб келинмоқда. 10-15 кун олдинги аномал совуқлар туфайли том қисмимизда ёриқлар пайдо бўлди. Ундан сўнг ёғингарчилик кўп бўлгани сабабли ўша ёриқлардан сувлар сизиб ўтган. Табиийки, бунинг электр энергиямизга таъсири бўлди. Юқори қисмда жойлашган электр тармоқларимизга ёғингарчилик натижасида сув ўтиб, қисқа туташувлар бўлди. Шунинг ҳисобига икки-уч кун электр монтажларини олиб бориш мақсадида иш жараёнида токларимизни ўчириб қўйдик. Ишларимизни амалга ошириб, муаммони бартараф этдик. Лекин ҳозирги вақтда том қисмимизда бажарилиши керак бўлган ишлар кўлами катта бўлгани сабабли, қолаверса, шу ҳолат яна қайтарилмаслиги учун 15-20 кун ичида усталаримиз ўзлари келиб, ўша ишларни тугатиб, якунига етказиб беради. Иш биринчи галда кутубхона томидан бошланади.

Биз ҳокимликка ҳеч қачон коммунал тўловларни юкламаганмиз, юкламаймиз ҳам. Ҳар қандай тўловни тадбиркорнинг ўзи амалга ошириб келяпти. Ҳозирги кунда қарздорлигимиз йўқ. Бўлса ҳам, у кутубхонанинг ёпилишига асос бўлолмайди. Чунки ҳар қандай коммунал тўловларни ўзимиз қилиб келганмиз ва бундан кейин ҳам ўзимиз амалга оширамиз. Худо хоҳласа, Муҳаммад Юсуфнинг туғилган кунига бошқа вилоятлардан ташрифларни кутяпмиз. Тадбирларни кенгроқ нишонлаш учун ҳам тайёргарликни бошладик”, — дейди Жасурбек Рўзиматов.

Республика Маънавият ва маърифат маркази Марҳамат туман бўлинмаси мутахассиси Эргашой Маликова кутубхона билан доимий ҳамкорлик қилинганини айтмоқда.

“Тумандаги ‘Келажак нури’ кутубхонаси билан доимо ҳамкорликда ишлаганмиз, тадбирлар ўтказганмиз. Китобхонларни кутубхонага жалб қилганмиз. Бинода вақтинча таъмирлаш ишлари олиб борилаётгани учун ҳозир бу нарсалар тўхтаб турибди. Ишлар тугаганидан кейин яна давом эттирамиз. Икки кун олдин бинонинг том қисмида қурилиш ишлари бўлаётганди. Фақат битта нарса бор, кутубхонада ҳеч қандай дераза йўқ. Ўтган йили иссиқда китобхонлар шу сабаб қийналди. Ҳатто кириб ишлашнинг имкони бўлмаган. Бу ердаги ходимлар ҳам яхши билишади. Қулайлик яратиш учун ҳам таъмирлаш ишлари олиб бориляпти. Тадбиркор билан туман ҳокими суҳбатлашганда 1 апрелга қадар таъмирлаш ишларини тугатиб, яна қайта фойдаланишга топширилиши билдирилган”, — дейди Эргашой Маликова.

Марҳамат тумани ахборот-ресурс маркази директори Зулфия Давлатованинг айтишича, бу кутубхона бир ярим йил давомида фаолият юритган. Икки ҳафта аввал вақтинчалик туман Фуқаролик ҳолати далолатномаларини ёзиш бўлими биносига кўчиб ўтишган.

“Бизнинг ахборот ресурс марказимиз жами 20 мингдан ортиқ китоб фондига эга. Аввал эски бинода, кейинчалик 2020 йилдан жорий йилнинг февраль ойига қадар тадбиркоримиз Қобилжон Обидов томонидан қурилган бинога кўчиб, иш фаолиятимизни олиб бордик. Бу ерда шароитлар яхши бўлгани учун туман аҳолисига яхши хизмат кўрсатдик. Бу ерда қанчадан қанча тадбирлар бўлиб ўтди. Кутубхонада таъмирлаш ишлари бошлангани туфайли туман ФҲДЁ биносига кўчиб ўтдик. Ҳозирда аҳолига шу ердан хизмат кўрсатишни бошладик. Таъмирлаш бинонинг ичкарисида бўлгани сабабли китобларга зарар етмасин деб кўчдик. Фаолиятимиз тўхтаб қолса бўлмасди. Сабаби дастуримиз бор, шунга китобларни тушириб боришимиз керак. У ерда интернетда узилиш бўлгани сабабли бу ерга вақтинчалик кўчиб ўтдик”, — дейди Зулфия Давлатова.

Марказ директорининг таъкидлашича, кутубхонадаги ойлик тўлаш билан боғлиқ масалалардан ташқари бошқа барча масалалар, яъни коммунал тўловлар тадбиркор томонидан қопланади.

“У ерга фақат фаолият олиб бориш учун борганмиз. Электр энергия масалалари ҳокимлик ва тадбиркор ҳамкорлигида ҳал бўладиган масалалар эди. Коммунал тўловлар бўйича шу кунга қадар бизга ҳеч қандай эътирозлар бўлмаган. Ҳамма нарсани тадбиркор билан ҳокимият келишган. Биз молиявий масалаларга аралашмаганмиз”, — дейди Зулфия Давлатова.

“Дарё” мухбири ўрганиши давомида иш бошқарувчи, ARМ раҳбари ҳамда ҳокимлик вакилига жамоатчиликни қизиқтирган бошқа саволларни ҳам берди ва жавоб олишга ҳаракат қилди. Бироқ масъуллар бу саволларга жавоб бермади. Ҳокимлик тадбиркор берган кутубхонани ўз балансига олишни кечиктирмоқда. Саволлар кўп, жавоблар эса етарли эмас.

“Дарё” воқеалар ривожини кузатишда давом этади.