Andijonda ikki oy davomida tezlikni oshirish orqali 26 marotaba qoida buzgan haydovchi 28 million so‘mdan ortiq jarima to‘ladi. Bu haqda “Daryo”ga MIBning Andijon viloyati boshqarmasi axborot xizmati xabar berdi.
Byuroning Andijon shahar bo‘limi davlat ijrochisi Rahmatillo Soliyevning aytishicha, Andijon shahrida yashovchi fuqaro B.I. 2022-yilning 20-oktabridan 28-dekabriga qadar o‘z avtomobilida harakatlanayotgan vaqtida yo‘llarda belgilangan harakat tezligini oshirib, jami yigirma olti marotaba qoidabuzarlik sodir etgan. Natijada qoidabuzarliklar bo‘yicha maʼmuriy jarimalar qo‘llangan bo‘lib, ularning miqdori jami 28 million 170 ming so‘mga yetgan. Bu bo‘yicha haydovchi bir necha marotaba ogohlantirilgan. Biroq u jarimalarni to‘lamasdan, qasddan bo‘yin tovlab kelgan.
Jarimalarni undirish maqsadida byuroning Andijon shahar bo‘limi xodimlari tomonidan fuqaro B.I. bilan tushuntirish ishlari olib borilib, qo‘llangan jarima pullari to‘liq undirilgan.
Qayd etish lozim, Maʼmuriy javobgarlik to‘g‘risidagi kodeksning 128-3-moddasida transport vositalari haydovchilarining belgilangan harakat tezligini oshirib yuborishiga jarima solinishi belgilab qo‘yilgan. Shuningdek, ushbu moddada haydovchi harakat tezligini oshirganlik bo‘yicha bir yilda bir necha bor huquqbuzarlik sodir etib, unga nisbatan maʼmuriy jazo qo‘llangan bo‘lsa, transport vositasini boshqarish huquqidan bir yildan ikki yilgacha bo‘lgan muddatgacha mahrum etilishi nazarda tutilgan.
Izoh (0)