Ички ишлар вазирининг шахсий таркиб бўйича буйруғи билан полковник Миржамол Миралимов Бухоро вилояти ИИБ бошлиғи лавозимига тайинланди. Бу ҳақда ИИВ матбуот хизмати хабар берди.
Маълум қилинишича, 24 февраль куни ички ишлар вазири генерал-лейтенант Пўлат Бобожонов томонидан Бухоро вилоятида ички ишлар органларининг хизмат фаолиятига оид тезкор йиғилиш ўтказилган.
Йиғилиш давомида Бухоро вилоятида ўтган ҳисобот даврида жиноятчиликка қарши курашиш масалалари ҳамда жамоат хавфсизлиги концепциясида белгиланган вазифаларнинг ижроси муҳокама этилган.
Шунингдек, маҳаллаларда ҳуқуқбузарликларни барвақт олдини олиш, “Хавфсиз ва равон йўл” дастури доирасида амалга оширилган ишлар, жамоат хавфсизлигини таъминлаш чора-тадбирлари, шахсий таркиб томонидан хизмат интизоми ва қонунийликка риоя этилиши ҳамда бошқа йўналишларда амалга оширилган ишлар танқидий таҳлил қилинган.
Вилоят ҳудудида содир этилаётган жиноятларнинг таҳлилидан келиб чиқиб, криминоген вазиятни янада барқарорлаштириш мақсадида ҳар бир туман-шаҳар ИИБ бошлиқлари ва мазкур ҳудудларга бириктирилган вилоят ИИБ раҳбар ходимлари томонидан маҳаллаларни жиноятлардан ҳоли ҳудудларга айлантириш, аҳолини рози қилиш, уларнинг мурожаатлари ечимига эътибор қаратиш, мавжуд муаммоларни аниқлаш ва уларни бартараф этиш бўйича вазифалар белгиланган.
Шунингдек, йиғилишдан Ўзбекистон Президентининг қарорига асосан полковник Шуҳрат Алиев Наманган вилояти Ички ишлар бошқармаси бошлиғи лавозимига тайинлангани эълон қилинган. Ички ишлар вазирининг буйруғи билан Бухоро вилояти Ички ишлар бошқармаси бошлиғи лавозимига Миржамол Миралимов тайинланган.
Тадбирда вилоят ҳокими Ботир Зарипов Ички ишлар вазирлигининг “Ички ишлар органларига кўмаги учун” кўкрак нишони билан тақдирланган.
Шу билан бирга, йиғилишда янги тайинланган вилоят ИИБ раҳбарига аниқ топшириқлар берилган.
Ўзбекистон Президентининг 22 февралдаги қарорига асосан полковник Шавкат Раҳмонов ички ишлар вазирининг биринчи ўринбосари — Тезкор-қидирув департаменти бошлиғи лавозимига тайинланганди.
Изоҳ (0)