21 февраль куни Қоҳирадаги “Ал-Иттиҳодия” саройида расмий ташриф билан Миср Араб Республикасида бўлиб турган Шавкат Мирзиёевни тантанали кутиб олиш маросими бўлиб ўтди. Бу ҳақда Президент матбуот хизмати хабар қилди.
Қайд этилишича, сарой олдидаги майдонда олий мартабали меҳмон шарафига фахрий қоровул саф тортган. Миср президенти Абдулфаттоҳ ас-Сиси Ўзбекистон раҳбарини қарши олиб, махсус шоҳсупага таклиф этган.
Ҳарбий оркестр ижросида икки мамлакат миллий мадҳиялари янграган. Сўнг давлат раҳбарлари фахрий қоровул сафи олдидан ўтиб, расмий делегациялар аъзоларини қутлаган.
Биргаликда суратга тушишдан сўнг икки томонлама олий даражадаги музокаралар бошланган.
Изоҳ (0)