Ўзбекистон ва АҚШ ўртасида дипломатик муносабатлар ўрнатилганига 31 йил тўлди — 1992 йил 19 февраль куни ушбу икки давлат ўртасида дипломатик алоқалар ўрнатилган кун сифатида тарих саҳифаларига битилган.
Шу муносабат билан Ўзбекистоннинг Вашингтондаги элчихонаси Twitter’даги саҳифасида кўп йиллик ҳамкорлик учун миннатдорчилик билдирилган пост эълон қилди ва 1992 йилнинг 17 февралида чоп этилган “Ўзбекистон овози” газатаси муқовасини илова қилди. Унда АҚШнинг ўша вақтдаги давлат котиби Жеймс Бейкернинг Ўзбекистонга икки кунлик тарихий ташрифи ёритилган. Ушбу ташрифдан сўнг икки давлат ўртасида дипломатик муносабатлар ўрнатилган.
“31 йил аввал Ўзбекистон ва АҚШ дипломатик муносабатлар ўрнатди. Шундан буён муштарак мақсадларни амалга ошириш ва ҳамкорлигимизни мустаҳкамлаш йўлида биргаликда ҳаракат қилиб келмоқдамиз. Кўп йиллар давомидаги ҳамкорлик учун миннатдормиз ва келгусида ҳам ҳамкорликни давом эттириб, биргаликда муваффақиятга эришишга умид қиламиз”, — дейилади элчихона хабарида.
2017 йилдан бери Ўзбекистоннинг АҚШдаги элчиси сифатида ишлаб келаётган Жавлон Ваҳобов ҳам кўп йиллик дўстона муносабатларга таянган ҳолда янада чуқурроқ алоқалар ўрнатилишига умид билдирди.
Маълумот учун, АҚШ Ўзбекистон мустақиллигини 1991 йил 25 декабрда тан олган. 1992 йил мартда эса Тошкентда АҚШ элчихонаси очилган. 2002 йил мартида Вашингтонда ташкил этилган учрашувда Ўзбекистон ва АҚШ президентлари Стратегик ҳамкорлик ҳақида декларацияни имзолаган.
2018 йил 15—17 май кунлари Ўзбекистон президенти Шавкат Мирзиёевнинг АҚШга биринчи расмий ташрифи бўлиб ўтди ва унинг якунлари бўйича Ўзбекистон ва АҚШ ўртасидаги стратегик шерикликнинг янги даври бошлангани ҳақида қўшма баёнот қабул қилинди.
Изоҳ (0)