Ўзбекистонда ҳоким ёрдамчилари фаолияти йўлга қўйилиши натижасида 2 миллион 200 минг нафар ишсиз фуқаро бандлиги таъминланди. Бу ҳақда Камбағалликни қисқартириш ва бандлик вазири Беҳзод Мусаев маълум қилди, дея хабар берди “Дарё” мухбири.
Бугун Тошкент шаҳридаги Ҳилтон меҳмонхонасида “Ўзбекистонда ижтимоий адолатни мустаҳкамлаш мақсадида муносиб меҳнатни илгари суриш” мавзусида халқаро конференция ўз ишини бошлади.
Конференцияда сўз олган вазир Беҳзод Мусаев сўнгги йилларда Ўзбекистонда аҳоли бандлигини таъминлаш мақсадида қандай ишлар олиб борилгани ҳақида маълумот берди.
“Камбағалликни камайтириш ва бандликни таъминлаш бўйича тизимли ишларни йўлга қўйиш мақсадида мутлақо янги тизим —'ҳоким ёрдамчилари' институти ташкил этилди. Ҳозирда республикадаги мавжуд маҳаллаларда 10 минг нафарга яқин ҳоким ёрдамчилари фаолият юритиб, улар тадбиркорликни ривожлантириш бўйича хизмат кўрсатмоқда. Ҳоким ёрдамчилари орқали субсидиялар ажратиш, иш билан таъминлаш, касбий тайёргарликка жалб қилиш ва бизнес юритиш асослари орқали қарийб 2,2 миллион кишининг бандлигига эришилди”, — деди вазир.
Вазирнинг қайд этишича, бугунги кунда Ўзбекистонда меҳнатга лаёқатли аҳолининг 1,3 миллиони ишсиз қолмоқда.
“Айни пайтда республика бўйлаб фаолият кўрсатаётган 26 та ишга марҳамат ягона маркази, 53 та касб-ҳунарга ўқитиш маркази, 539 та касб-ҳунар маркази, маҳаллалардаги ўқув марказлари орқали меҳнат бозорида талаб катта бўлган 70 дан ортиқ касблар бўйича ишсиз фуқароларга таълим берилмоқда”, — дейди Беҳзод Мусаев.
Вазирнинг қўшимча қилишича, амалга оширилган чора-тадбирлар натижасида республикада ишсизлик даражаси 8,9 фоизга туширилган. Қашшоқлик даражаси кўрсаткичи 17 фоиздан 14,1 фоизга тушган.
“Биз 2023 йилда барча имкониятларимизни ишга солиб, Ўзбекистонда қашшоқлик даражасини 12 фоизгача камайтиришни режалаштирганмиз”, — деди вазир.
Изоҳ (0)