Туркиянинг TRT Haber телеканали YouTubeъдаги каналида кетма-кет даҳшатли зилзилалардан жабр кўрган Ҳатай вилоятининг аввал ва ҳозир қандай кўринишини кўрсатди.
Ҳатай — Туркиянинг жануби-шарқида, Сурия билан чегарада жойлашган вилоят. У Туркиянинг 6—7 февраль кунлари содир бўлган йирик зилзилалардан энг кўп зарар кўрган ўнта вилоятидан биридир. TRT Haber эълон қилган видеода зилзила вилоят қиёфасини қандай ўзгартирганини кўриш мумкин.
Вилоятда вақти-вақти билан ер силкинишлари давом этмоқда. Сўнгги расмий маълумотларга кўра, Туркияда зилзила қурбонлари сони 41 мингдан ошди. Мамлакатда юз берган зилзила оқибатида 105 мингдан ортиқ бино вайрон бўлган. Табиий офатлар оқибатларини бартараф этиш бошқармаси 6 февралдаги ҳалокатли зилзилалардан сўнг олимлар 6 мингдан ортиқ ер силкинишини ҳисоблаганини маълум қилди. Битта афтершок 6,6 магнитудали, 40 таси 5 дан 6 баллгача, яна 436 таси эса 4-5 магнитудага етган.
“6 февралдан кейинги ер силкинишлари сони 6 040 дан ошди, таққослаш учун, оддий вақтларда бу Туркияда тўрт ой ичида қайд этилган зилзилалар сонига тенгдир”, — дейилади хабарда.
Изоҳ (0)