Украина президенти Владимир Зеленскийнинг рафиқаси Елена Зеленская Жанубий Кореянинг Channel А телевидениесига берган интервьюсида Россия раҳбари Владимир Путин билан учрашса, унга нима дейишини айтди.
Путинга нима дейиши сўралганда, Зеленская у билан учрашишни истамаслиги ва унга мурожаат қилишдан маъно йўқлигини таъкидлади. Украина президенти рафиқаси буни Путин мурожаатга эътибор бермаслиги билан изоҳлади.
“Мен ҳеч қачон у одам билан учрашишни истамасдим. Менимча, ўлдириш учун келган одам билан ҳеч ким учрашишни истамасди. Шунинг учун унга нима дейишимни тасаввур ҳам қилолмайман. Менимча, украиналикларнинг ягона гапи бизни тинч қўйинг, бўлади. Унга ҳеч қандай мурожаат йўлламоқчи эмасмиз. Чунки улар бизнинг мурожаатимизга муҳтож эмас, нима деб ўйлашимиз, уларнинг ҳаракатини дунё қандай баҳолашига аҳамият беришмайди”, — деди Зеленская.
Шунингдек, Украина президенти рафиқаси мамлакат ҳали ҳам қўллаб-қувватлашга ва доимий глобал ёрдамга муҳтожлигини айтди.
“Жавоб қайтариш учун қурол бўлиши керак, акс ҳолда ўлиш мумкин. Инсон капиталини, инфратузилмани, уй-жойларни, мактабларни, болалар боғчаларини тиклаш учун бизга ёрдам керак. Чунки уруш нафақат фронт чизиғи, балки иқтисодий инқироз ва гуманитар фалокат ҳамдир. Ўйлайманки, ёрдам беришни истаган ҳар бир киши ўзи учун бундай имкониятни топади”, — деди Зеленская.
Изоҳ (0)