“Қирғизистоннинг барча президентлари учрашиб, бир-бирини кечирди” — Садир Жапаров

Садир Жапаров Қирғизистоннинг барча президентларини бир жойга йиғиб, учрашув ўтказганини маълум қилди. Президент матбуот котиби Эрбол Султанбаев бу маълумотни тасдиқлаб, учрашув нейтрал ҳудудда бўлиб ўтганини айтган. Унда Асқар Акаев, Қурманбек Бакиев, Роза Ўтунбоева, Алмазбек Атамбаев ва Сўронбай Жээнбеков иштирок этган. ОАВ хабарларига кўра, йиғилиш Дубайда бўлиб ўтган.

“Мамлакат келажаги йўлидаги асосий орзум рўёбга чиқди — халқ ҳамжиҳатлиги учун аввалги барча президентларни бир дастурхонга йиғиб, учрашув ўтказдим”, — дея Жапаровнинг сўзларини келтирмоқда Кактус.медиа.

Садир Жапаровнинг таъкидлашича, глобаллашув даврида ички барқарорлик ва миллий тотувликка интилаётган давлатларгина ривожланиб, қудратли давлатларга айланади.

“Ўз вақтида буюк империя тузиб, Евросиё маконида яшаган қадимги қирғизлар охир оқибат нимага эришди? Империя тарқоқлик ва ҳокимият учун ўзаро курашлар туфайли парчаланди. Натижада биз Марказий Осиёнинг бир бурчагидан жой олдик. Ҳа, биз мустақилликка эгамиз, лекин равнақ топишимизга нима тўсқинлик қилмоқда? Агар келишмовчиликларни ортда қолдирилса, бу масала, менимча ўз-ўзидан йўқ бўлади”, — деган Жапаров.

Унинг айтишича, ҳозир мамлакат шимол ва жанубга, вилоятларга бўлинган, ҳамма фақат ўзини ўйлайди. Бундан ташқари одамлар ҳали ҳам маълум бир президент тарафдорларига бўлинган. Қирғизистон келажаги учун барча бирлашиб, бундай тарафкашликка барҳам бериш лозим, бунинг учун эса аввало президентларнинг ўзи бирлашиши керак.

“Бир пайтлар халқ томонидан сайланиб сўнг ўз лавозимини тарк этган аввалги президентлар билан қўшма йиғилиш ўтказилса, бу халқнинг жипслашишига хизмат қилади ва энг катта туҳфа бўлади, деган ўй менга анчадан буён тинчлик бермаётганди. Ниҳоят, қатъият билан бу эзгу ғояни амалга оширишга муваффақ бўлдим”, — деган Садир Жапаров.

Унинг қайд этишича, собиқ президентлар ўз эътирозлари, аламларини билдирди, шу билан бирга хатоларини тан олиб ва бир-бирини кечирди.

“Менинг мақсадим ҳам шу эди. Аввалги президентларнинг ҳар бирининг тарафдорлари, ҳар бир вилоят аҳолиси сиёсат билан шуғулланишни тўхтатиб, келажак учун иқтисодиётни ривожлантиришга ўтишини ният қиламан”, — деган Қирғизистоннинг амалдаги президенти.